Intervistoi: Fabjola Kuburi
-Suela, ishe një stilistet e eventit më të veçantë të vitit, “Lumturo dhimbjen” si erdhi kjo sfilatë dhe si u gjende ti në mesin e asaj buqete veshjesh?
-Përshëndetje. Është hera e dytë që marr pjesë në këtë sfilatë, por mendoj që idealet i bashkojnë njerzit, mjafton ta duash atë që do të bësh ashtu si Brixhilda dhe njerëzit, rrethanat, vendi do të bashkohen e do të vijnë.
-Kauza ishte bamirësia dhe ti je një nga njerëzit më filantrope që njoh. Brixhida gjeti një krah të fortë në atë nismë të madhe për të ndihmuar fëmijët e sëmurë nga kanceri?!
-Brixhida ka të njëjtat ideale me mua në lidhje me bamirësinë. Unë nuk e mbaj veten për filantrope, por në një vit pune një pjesë të vogël ja dedikoj bamirësisë dhe është pjesë që unë e bëj me shumë kënaqësi .. jashtë kamerave, por edhe në praninë e tyre.
-A pati kërkesa për veshjet pas sfilatës?! Si ishte feedback-u?
-Ja kisha premtuar Brixhildës, sido që të venë shitjet unë e kam taksur një buxhet nga ana ime dhe ndoshta dashuria për këtë kauzë ka bërë që fustanet po shiten sepse janë krijuar për të përcjellur lumturi. Unë nuk jam muslimane dhe mendoj që bamirësia nuk është veshur domosdoshmërisht nën petkun e fesë, neve na bashkoi zemra dhe qëllimi i mirë. Me dashuri dhe shpirt të mirë asgjë s’është e pamundur!
-Në fund?
-I uroj suksese Brixhildës sepse na bashkoi në një sfilatë të niveleve ndërkombëtare dhe të mendosh që të gjithë bashkëpuntorët kanë qenë vullnetar, si dhe i uroj fëmijëve me sëmundje të rënda shërim të shpejtë. Ne do të shkojmë në spital këto ditë për të çuar fondet që kemi mbledhur gjatë sfilatës dhe ato që janë mbledhur nga shitja e fustaneve.
