– Vajzës sime, pas disa shqetësimesh që kishte dhe kontrollit mjekësor që i bëmë, i doli se ka gur në tëmth. Çfarë më këshilloni ju si specialiste në këtë fushë? Vajzën e kam të vogël, është 6 vjeçe. A është normale që një fëmijë i kësaj moshe të ketë gurë në tëmth? Faleminderit.
Dr. Valdete Malaj, gastro-hepatologe: – Nuk është e çuditshme që edhe fëmijët e kësaj moshe të rezultojnë që kanë gurë në tëmth. Kemi dy lloje gurësh në tëmth: Një lloj gurësh janë pigmentos dhe një lloj tjetër, janë pasojë e yndyrnave të larta në gjak. Në rastin e dytë, kur gurët janë në formë llumi ose më të vegjël se 1 cm., ata mund të tentohet të shkrihen. Mendoj se në rastin tuaj, duhet të vizitoheni dhe t’i bëni analizat vajzës për të gjetur çfarë lloj guri ka, sa e ka madhësinë dhe a ia vlen të fillohet mjekimi. Kur nuk i plotëson kushtet për mjekim, fshikëza e tëmthit mund edhe të hiqet përfundimisht. Megjithatë, ndjekja nga afër me mjekun përkatës i jep zgjidhje problemit të fëmijës suaj. Të shkuara vajzës.
