Pse bien flokët? Si ta mbash më gjatë ngjyrën me të cilën i ke lyer, si t’i kontrollosh kaçurrelat e pabindura? Ndiq këshillat e parukieres dhe estetistes sonë Merita Merja!
- Çfarë modeli të përdor për të fshehur flokët e yndyrshëm?
- Zgjidhja më e mirë do të ishte një prerje e flokëve me shkallëzim ose me balluke të gjata. Për të frenuar ose reduktuar yndyrën, këshillohet larja e flokëve me shampon e duhur, shpëlarja me ujë të vakët dhe tharja me ajër të ftohtë, sepse ajri i nxehtë e shton yndyrën. Në këtë rast, mund ta lani kokën më shpesh, për shembull, çdo dy ditë.
- Si ta mbaj më gjatë bojën e flokëve?
- Ngjyra e flokëve shpëlahet pak nga pak me larjet e tyre. Për të zgjatur ngjyrën është mirë të përdoret një shampo e veçantë për flokët e lyer. Gjithashtu, sugjerohet të përdoren bojërat gjysmë të përhershme, sepse zgjasin më shumë dhe të aplikohet një maskë në javë. Për prerjen është mirë të përdoret një me shkallëzim.
- Si t’i mbroj flokët e mi që këputen dhe digjen?
- E ftohta, dielli, era, tharja dhe krehja i dëmtojnë flokët dhe i bëjnë të brishtë ata. Për t’i forcuar, përdor produkte të veçanta, që i mbrojnë. Gjithashtu, është mirë të bësh herë pas here maska ushqyese. Përsa i përket modelit, këshillojmë një prerje në të cilën, balluket mblidhen nga pas.
- Më bien flokët. Çfarë të përdor?
- Ndërrimet e stinëve, dieta dhe stresi janë shkaqet më të zakonshme të rënies së flokëve. Këshillohet të përdorësh produkte ushqyese me vitamina dhe minerale. Gjithashtu, ekzistojnë edhe shampot kundër rënies. Nëse rënia është e dukshme, është mirë të përdorësh kapsula ose flakone që shoqërohen edhe me shampon përkatëse kundër rënies. Në këto raste, këshillohet prerja e flokëve shkurt, me tufa të gjata dhe të shpupurisura, për t’i rigjallëruar.
- Si t’ia bëj për të shtruar flokët kaçurrelë rebelë?
- Në këtë raste, duhet t’i ushqesh flokët me produkte të veçanta, që ndihmojnë të shtrohet kaçurreli dhe t’i jepet pesha e duhur atij. Kremi i modelimit, për shembull, përdoret për ta patur më të lehtë krehjen e flokëve dhe, meqë nuk përmban alkool, nuk i than flokët si dhe tendenca e fundit, keratina. Stili i prerjes varet nga lloji i kaçurrelit që ke, por në shumicën e rasteve, është mirë t’i mbash të gjata, sepse kështu e ke edhe më të lehtë për t’i kontrolluar. Një floknajë e gjatë, me shkallëzim fare të lehtë, është ideale për të nënshtruar kaçurrelat.