E ëmbël apo e zjarrtë, me gjuhë apo jo, të gjithë e praktikojmë artin e puthjes. Ky gjest i vogël ka brenda tij sekrete që mbase nuk i dinit. Ja, cilat janë ato:
- Burrat janë më të ndjeshëm ndaj puthjes sesa gratë. Sipas një sondazhi, për 40% mes tyre mjaftonte një puthje e gjatë e shkëmbyer me partneren për të ngjallur menjëherë dëshirën për të bërë dashuri.
- Dy të tretat e personave që puthen, e përkulin kokën në mënyrë spontane djathtas, sipas studiuesit gjerman Onur Güntürkün, që ka marrë në studim disa qindra çifte të kombësive të ndryshme.
- Ju shkëmbeni afro 80 milionë baktere kur putheni me dikë për herë të parë (për çiftet, kjo shifër është më e ulët, sepse ata kanë më shumë baktere të përbashkëta). Kjo shifër është shumë më e lartë se 77 mijë baktere që ka nëpër banjot publike. Por, sipas të njëjtit studim të gazetës “Microbiome”, lajmi i mirë është se të gjitha këto baktere nxisin sistemin tonë imunitar.
- Kur puthemi, ne vëmë në punë 29 muskuj të ndryshëm, ndër të cilët 17 i përkasin vetëm gjuhës, ndërsa për një puthje të lehtë, pa gjuhë, fusim në punë 15 muskuj. Kjo shërben për të mbajtur tonikë në mënyrë të këndshme muskujt e fytyrës.
- Ekziston shkenca e puthjes, që quhet filamatologji. Në fakt, tema e puthjes (dhe gjithçka që ka lidhje me të) i apasionon prej kohësh shkencëtarët.
- Edhe kafshët puthen: Shimpanzetë, kërmijtë, lopët, por edhe elefantët dhe papagallët.
- Kur ne puthemi, sekretojmë oksitocinën dhe serotoninën, që rregullon humorin (dhe oreksin). Me një fjalë, puthja është e mirë për gjendjen tonë shpirtërore.
- Puthja me gjuhë bën të humbasin 5 kalori në disa sekonda. Nëse llogaritet ajo gjatë gjithë jetës, ky numër shkon në 30 mijë, thjesht vetëm duke u puthur. Mund të themi se është një nga sportet më pak të lodhshëm që njohim (dhe që nuk shkakton dhimbje muskujsh).
- Rekordi botëror i puthjes ekziston. Atë e mban një çift tajlandez, Ekkachai dhe Laksana Tiranarat që prej vitit 2013: 58 orë, 35 minuta dhe 58 sekonda. Llogariteni vetë se sa kalori kanë humbur ata gjatë kësaj gare të çmendur.
- Në disa vende, puthja në publik është e ndaluar me ligj. Në Meksikë, për shembull, në shtetin konservator të Guanahuatos, një burrë u arrestua pse po puthte të shoqen në rrugë. Në qytetin e Sitekit, në Suazilend, rrezikon një gjobë për puthjen. Puthuni sa më shumë pra, por jo gjithmonë aty ku doni!