– Përshëndetje! Jam një vajzë që sapo kam përfunduar studimet e larta për parukeri dhe jam e interesuar të filloj punë në Itali. I drejtohem koordinatores së INAS-it Shqipëri me këtë pyetje: Cilat janë dokumentet që më duhen për të filluar punë si parukiere? Me respekt, Enkelejda.
Beskida ALIAJ, Koordinatore “INAS – ALBANIA”: E nderuar letershkruese! Për t’u punësuar në Itali, është e domosdoshme një kontratë pune me kohë të përcaktuar apo të papërcaktuar nga një punëdhënës italian, e cila i dërgohet Sportelit të Emigracionit pranë Prefekturës së zonës ku ushtron aktivitetin punëdhënësi.
Dokumentacioni që duhet të paraqitet për kërkesën e vizës për punësim:
* formulari i kërkesës për vizë (duhet përdorur një formular për secilin aplikant për vizë, i plotësuar në secilën pjesë të tij dhe i firmosur);
* pasaporta e vlefshme (skandenca e pasaportës duhet të jetë të paktën tre muaj pas mbarimit të afatit të vizës që kërkohet);
* një fotokopje e pasaportës;
* 2 fotografi të kohëve të fundit të formatit teser;
* fotokopje e Autorizimit (Nulla Osta) lëshuar nga Sporteli i Vetëm për Emigracionin (SUI) prej jo më shumë se 6 muaj;
* Certifikatë personale (vetëm nëse është kërkesa e parë për vizë, për të verifikuar kompetencën territoriale të Kancelarisë Konsullore të Ambasadës së Tiranës).
Kini parasysh: Të gjitha dokumentat dhe deklaratat në shqip të lëshuara nga autoritetet lokale, duhet të jenë të përkthyera në gjuhën italiane dhe të apostiluara nga Ministria e Punëve të Jashtme Shqiptare.
Certifikatat e gjendjes civile duhet të jenë të lëshuara nga jo më shumë se 6 muaj.
Formularët për kërkesën per vizë dhe modularët në përdorim mund të shkarkohen nga siti i Ambasadës vvvvvv.ambtirana.esteri.it (në veçanti, konsultohuni në sektorët “Viza” dhe “Modulistikë”), si dhe shpërndahen pa pagesë në Zyrat e Ambasadës. Përfaqësia Diplomatike apo Konsullore ka të drejtën të kërkojë dokumentacion shtesë në rast nevoje. Po kështu, paraqitja e dokumentacionit të kërkuar nuk sjell domosdoshmërisht lëshimin e vizës. Ju falënderoj për besimin.
