E lexuat gazeten “Intervista” te kesaj jave? Kishte shumë intervista interesante, apo jo? Por e dini se kishte edhe shumë personazhe qe nuk i intervistuam dot? Ja, disa nga ata…
EDI RAMA
Kryeministrin Edi Rama e pamë këtë javë të qeshte e të bënte gallatë me gratë e Laprakës, ndërsa shpërndante certifikatat e pronësisë, ndërkohë që gjithë javën nuk u prononcua fare për çështjen Doshi. A ndjen ndonjëfarë përgjegjësie ai për gjithçka ndodhi, deshëm ta pyesnim sikur t’i merrnim një intervistë? A do të ndodhnin gjithë këto, sikur Doshi të mos ishte deputet?! A nuk ishte ai që e zgjodhi zotin Doshi?! A nuk ishte ai që vendosi edhe për shumë deputetë të tjerë që janë, siç thotë populli: “merre me lëng, se mishi u mbarua”?! Do të ndodhnin këto dhe shumë gjëra të tjera të padëshiruara, sikur deputetët të zgjidheshin në mënyrë demokratike, me zgjedhje brenda partisë, siç ndodh në gjithë partitë moderne evropiane? Po për aleancën me zotin Meta, është bërë ndopak pishman zoti Rama?! Ka fituar, apo ka humbur ai nga kjo aleance? Si mendon ai tani, pas një viti e gjysëm në pushtet?! Ja, këto deshëm t’i pyesnim kryeministrit Rama në një intervistë këtë javë, por nuk mundëm…
PETRIT ÇINARI
Personazhi më enigmatik i kësaj jave, pa dyshim që ishte Petrit Çinari, personi i cili shkoi vetë në prokurori për të deponuar që babai i Ilir Metës i kishte kërkuar vrasjen e Tom Doshit. Ne u përpoqëm të kontaktojmë me zotin Çinari, por nuk mundëm. Deshëm ta pyesnim atë nëse është e vërtetë se zoti Doshi i ka falur një apartament gruas së tij? A është e vërtetë se ka diagnozën “epilepsi psikomotore me çregullime psikotike”, sipas së cilës nuk mban përgjegjësi ligjore për veprimet që bën? Nëse është e vërtetë kjo dhe nëse është e vërtetë gjithashtu se ka qenë qitës i mirë, atëherë, me këtë hov që kanë marrë videot e kërcënimet, tani duhet të fillojë stërvitjen, se do të ketë punë…
ADRIATIK LLALLA
Një pikëpyetje e madhe na lindi këtë javë ndërsa dëgjonim lajmet, pikëpyetje të cilave vetëm Prokurori i Përgjithshëm mund t’u jepte zgjidhje: Toni i Kombinatit, i njohur deri tani si porositësi i vrasjes së Metës, erdhi nga Gjermania këtë javë dhe dëshmoi para prokurorisë pa i hyrë asnjë gjemb në këmbë. Po Duri nga Fushë-Kruja, pse duhet të rrijë në burg për një vrasje që nuk e ka kryer, ndërkohë që porositësi i kësaj vrasjeje është i lirë?
DRITAN HILA
Një ngjarje tjetër enigmatike e kësaj jave ishte edhe dorëheqja e zëvendësministrit të Mbrojtjes, Dritan Hila. Ky lajm u bë i ditur nga vendimi i Këshillit të Ministrave, por nuk u tha asgjë për motivet e dorëheqjes. Madje edhe shtypi është mjaftuar duke i quajtur ato motive personale, sepse ai do i përkushtohet gazetarisë dhe shkrimeve (?!), motive që askush nuk i beson… Ndërkohë, thashethemet thonë ndryshe. Sipas tyre, Dritan Hila, i njohur si gazetar e diplomat, por edhe si bashkëshort i të mirënjohurës Rudina, dha dorëheqjen, sepse është duke u përgatitur të krijojë një parti të re, të quajtur Fronti i Ri Popullor dhe do të përfaqësohet me të në zgjedhjet lokale, duke pretenduar të jetë një Cipra i ri për Shqipërinë… Të jetë e vërtetë vallë? Ne u përpoqëm të intervistonim zotin Hila, por nuk mundëm. Shpresojmë javën e ardhshme…
LULZIM BASHA
Pas demonstratës së ditës së enjte deshëm të intervistojmë edhe zotin Basha, por nuk mundëm. Ai ishte me zërin komplet të shuar e nuk mund të fliste. Ne deshëm t’i bënim vetëm një pyetje, në fakt: Ç’do të thoshte ai sikur prokurorët e vendit, por edhe ata të huaj që kërkon zoti Doshi, të deklarojnë se e gjitha kjo ishte një flluskë sapuni?! Do t’i kërkonte të falur ai zotit Meta?! Po atyre 300 mijë vetëve që i nxori kot në shesh të enjten?
(Gazetën “Intervista”, të plotë, mund ta blini online, që ditën e daljen në treg, vetëm për 89 cent, në: http://www.pressreader.com/albania/intervista)
