Një moment i veçantë dhe plot emocion u përjetua në skenën e spektaklit “Shën Tereza, shqiptarja e gjithë botës”, produksion i producentit Sokol Guga, ku kryebashkiakja e Roskovecit, Majlinda Bufi solli një interpretim të ndjerë të poezisë “Duart e dritës”, kushtuar figurës së shenjtë të Nënë Terezës.
Nën tingujt dhe atmosferën solemne të spektaklit, interpretimi i Bufit përcolli një mesazh të fortë humanizmi, dashurie dhe shprese, duke u kthyer në një nga momentet më emocionuese të mbrëmjes.
Poezia “Duart e dritës”, përmes fjalës artistike, solli në vëmendje simbolikën e duarve të Nënë Terezës, duar që përfaqësojnë përkushtimin, sakrificën dhe dashurinë ndaj njerëzimit.
Me prezencën dhe interpretimin e saj, Majlinda Bufi i dha këtij momenti një dimension të veçantë emocional, duke e përcjellë mesazhin e Shën Terezës përmes artit dhe fjalës.
Spektakli “Shën Tereza, shqiptarja e gjithë botës” është një projekt i konceptuar dhe realizuar nga producenti Sokol Guga, i cili prej disa vitesh i kushton këtij produksioni një vëmendje të veçantë artistike dhe kulturore. Projekti synon të sjellë në skenë figurën e Shën Terezës dhe vlerat universale që ajo përfaqëson: humanizmin, dashurinë dhe solidaritetin.
Një natë ku arti, fjala dhe mesazhi i Shën Terezës u bashkuan në një skenë, duke përcjellë një kujtesë të bukur për fuqinë që ka mirësia për të ndriçuar njerëzit dhe kohën.
