– Doktor Dashamiri, ju përshëndes. I fejuari im vuan nga diabeti i tipit të parë. Unë kam dëgjuar se mund të jetë edhe ngjitës. A është e vërtetë që kjo sëmundje është ngjitëse? Po te fëmija, a trashëgohet? Ne do të martohemi së shpejti dhe po planifikojmë një fëmijë. Faleminderit.
Dr. Dashamir Gjergji endokrinolog-diabetolog: – E nderuar lexuese, së pari ju përgëzoj për pyetjen interesante që më keni drejtuar. Për të qenë i sinqertë, e kam hasur disa herë këtë pyetje te shumë pacientë që më vijnë çdo ditë, ndaj edhe juve po ju jap të njëjtën përgjigje që u kam edhe atyre: Diabeti i sheqerit nuk është sëmundje ngjitëse, domethënë, nuk transmetohet me ushqim, ajër, kontakte, papastërti etj. sepse këto janë karakteristikat e sëmundjeve ngjitëse dhe diabeti nuk është sëmundje e tillë.
– Sa për faktin nëse trashëgohet te fëmijët, dua të ndalem pak më gjatë dhe me një parantezë profesionale e cila konsiston në faktin që diabeti i sheqerit, siç e kemi thënë, është disa llojesh e zakonisht, është tipi i dytë i diabetit ai që trashëgohet. Ky lloj diabeti fillon mbi 40 vjeç e trashëgohet po në këto mosha dhe jo në moshat e reja. Statistikat botërore tregojnë që numri i fëmijëve të prekur nga diabeti i tipit 1 është thuajse i barabartë si te prindërit që vuajnë dhe nuk vuajnë me diabet. Pra, ka një rritje fare të lehtë dhe të papërfillshme në këtë mes.
– Gjithsesi, unë mendoj se nuk ka gjë për t’u shqetësuar në lidhjen tuaj dhe, nëse nuk jeni të qartë për përgjigjen, mos ngurroni të na kontaktoni sërish. Besoj gjithashtu se i fejuari juaj, duke qenë i diagnostikuar me këtë tip diabeti, ka kujdes në dietën e tij dhe mjekohet. Ju uroj jetë të lumtur së bashku.
