Përshëndetjet dhe urimet më të mira për gazetën tuaj dhe për rubrikat e përzgjedhura me kujdes për ne lexuesit. Unë lexoj çdo rresht në gazetë por jam e apasionuar pas kuzhinës dhe ai është këndi im i preferuar, prandaj do doja të më përshkruanit një recetë me ndonjë lloj fruti deti që mund të gatuhet shpejt dhe të ketë shije të veçantë. Faleminderit. Zonja nga Tirana!
Përgjigjet Emanuela e Restorant “Il Tipico”, Rr Johan Fon Han (Tefta Tashko) në krah të gjimnazit “Ismail Qemali” Tiranë, +355 (0) 42370592, 0689049531:- E dashur zonjë nga Tirana, si fillim ju falënderojmë që na ndiqni dhe që ju pëlqen këndi ynë. Ne çdo numër përpiqemi të sjellim diçka të veçantë, të këndshme dhe të shijshme sigurisht për ju që doni t’i provoni këto gatime në shtëpitë tuaja. Për kërkesën tuaj do t’ju sugjeroja skampi furre me pomodorini. Për të realizuar këtë recetë duhet këto përbrës:
Skampi 250 gr
Pomodorini 3 kokrra
Kripë
Piper
Majdanoz
Përgatitja:
Marrim skampin, e pastrojmë dhe më pas e ndajmë përgjysmë. E shtrojmë në letër kuzhinë sipër tavës dhe e marinojmë me kripë, piper dhe pomodorini. E vëmë në tavë dhe e fusim në furrë në një temperaturë 250 gradë për 15 minuta. Më pas e vëmë në pjatë dhe e dekorojmë me majdanoz. Pjata është gati. Ju bëftë mirë!