– Kam parë në ëndërr dy varre të të njëjtit person (tezen). Te njëri, fytyra e saj ishte e mbuluar, kurse te tjetri, jo. Varret ishin në oborrin e motrës sime. E vdekura lëvizte, kurse motra insistonte që unë të flisja sepse thoshte: “Ka dëshirë, gëzohet”. Kur u afrova me shumë frikë për ta përqafuar, iu prezantova. Në heshtje thosha: “Do të gëzohet nëna kur t’i tregoj që e kam parë”. Në fund, ajo më tha: “Kur të jetë kismet do të të marr”, mirëpo nuk jam shumë e sigurt nëse e kishte fjalën për mua, motrën apo nënën time. Çdo ditë e mendoj këtë ëndërr, kam frikë mos ndodh ndonjë gjë. Ju faleminderit.
– Një ëndërr tregon për një lloj frike të brendshme që keni ju ndaj më të dashurve tuaj. Jeni shumë i lidhur pas familjes, por sidomos pas motrës dhe nënës suaj dhe gjithnjë trembeni se mos atyre u ndodh ndonjë gjë e keqe. Ndërkohë, një ëndërr e tillë tregon që ato kanë jetë të gjatë, ndaj nuk duhet të keni frikë. Vetëm duhet të keni kujdes shëndetin si ju vetë, ashtu edhe motra e nëna juaj. Shprehja që ajo ka thënë: “Kur të jetë kismet do të të marr!”, do të thotë që kur të jetë e shkruar për gjithsecilin prej nesh do të shkojmë në botën tjetër, ndaj mos kini frikë sepse asgjë e keqe nuk do të ndodhë, thjesht duhet të keni më shumë kujdes për veten e shëndetin tuaj.
