Si ta ul fryrjen e barkut?

– Përshëndetje instruktorit! Ju lutem, a mund të më thoni si ta kaloj këtë fryrjen e çuditshme që ndjej në stomak dhe bark? Nuk jam e shëndoshë, por isha 10 ditë në Turqi dhe pas kthimit, ndjej fryrje. Theksoj që nuk kam ngrënë shumë sepse jam e fiksuar pas fizikut tim.
Mario instruktor: – E nderuar lexuese, së pari bëni një vizitë se mund të keni marrë ndonjë ftohje. Nëse nuk keni asnjë problem shëndetësor, duhet të keni parasysh se shpesh, edhe ndërrimi i klimës dhe ambientit, ose udhëtimet e gjata me autobus sjellin një fenomen të tillë në fizikun tonë. Gjithsesi, për ta larguar këtë fryrje, do t’ju këshilloja të konsumoni sa më shumë ujë sepse dehidratimi ul metabolizmin duke ndikuar disi në shtimin në peshë dhe në fryrje. Zëvendësojeni kafen me çaj jeshil dhe pini 2-3 filxhanë me çaj jeshil në ditë. Çaji jeshil nxit metabolizmin dhe ndikon në uljen e fryrjes. Konsumoni në mëngjes tërshërë sade me kos, sepse kjo e fundit ndikon shumë në uljen e barkut. Hani sa më shumë perime dhe disa fruta në ditë sepse kanë më pak kalori dhe përmbajnë fibra. Përdorni shpesh në gatim orizin kaf, sepse përmban karbohidrate, gjë që do të përmirësojë problemin tuaj. Jini sa më aktive tani që jeni kthyer nga pushimet. Mundësisht, rifilloni palestrën, e cila do t’ju ndihmojë të riktheheni në formën që keni qenë.