Andrea Vesho është një djalosh nga Vlora që punon e jeton prej shumë vitesh në Greqi dhe që pasioni për muzikën e përkushtimi i tij e kanë bërë që të arrijë të integrohet në tregun muzikor. Kënga e parë e tij “Mos harroni Shqipërinë” e lançuar në vitin 2012, ka qenë një këngë ku ka shpalosur qartë dashurinë e këngëtarit dhe të gjithë emigrantëve për atdheun, dashuri që ai e ka pasqyruar përmes këngës. Shumë shpejt, Andrea do të sjellë për publikun tre projekte të reja muzikore…
Fabjola Kuburi: – Andrea, përshëndetje dhe mirëserdhe në faqet e gazetës sonë! Amund të bësh një prezantim për lexuesit e “Intervista”?
Andrea Vesho: – Përshëndetje! Unë vij nga një familje që e ka trashëgimi muzikën. Jam me origjinë vlonjate dhe muzikën e kam dashur që në fëmijëri. Kur erdha në Greqi u njoha me një njeri që e kam shumë mik, Dashamir Vrapin, i cili, kur më dëgjoi të këndoja, më dha kurajo dhe më mbështeti për t’u marrë me muzikë dhe për të mos e lënë pas dore atë. Kështu, derisa lançova këngën time të parë.
– Pra, ti punon dhe jeton në Greqi…
– Po, unë jetoj prej vitesh në Greqi dhe punoj në të njëjtën kohë këtu.
– Si iu fute rrugës së muzikës?
– Kam integruar në muzikë duke kënduar fillimisht këngët e njohura të kolegëve të mi. Kënga ime e parë e lançuar në Folk Plus me titull “Mos harroni Shqipërinë” në vitin 2012 me tekst të Akrem Lamajt dhe produksion të Alban Hoxhajt, ka qenë impakti im i parë me publikun e gjerë.
– E mban mend si je ndjerë kur ke kënduar për herë të parë?
– Për herë të parë kam kënduar në një studio muzikore dhe ato momente kanë qenë shumë të veçanta, me ankth, të mbushura me emocione.
– Cili është vendi që zë muzika në jetën tënde? Sa e rëndësishme është ajo për ty?
– Kënga për mua është gjithçka, më jep jetë dhe frymëzim që të jetoj. Është motiv jete.
– Përveç muzikës, merresh me diçka tjetër?
– Sigurisht që po. Përveç muzikës, kam studiuar në Itali për stilist flokësh dhe e ushtroj këtë profesion edhe këtu.
– Për disa, muzika është pasion, ndërsa për disa të tjerë profesion. Për ty, çfarë është?
– Muzika për mua ka qenë një pasion shumë i madh, por me kalimin e viteve është kthyer edhe në profesion. Muzika është jetë.
– Të kënduarit live, sigurisht që ka edhe shumë përfitime financiare. Ti, e shikon këtë anë të muzikës?
– Kur dikush ka dhuratë zërin, muzika, të kënduarit live në fillim bëhet për kënaqësi të vetes dhe publikut e pastaj për anën financiare. Unë të paktën kështu e shikoj dhe e mendoj.
– Ta kanë thënë shumë njerëz që “ti di të këndosh bukur”?
– Sigurisht që ata që më kanë dëgjuar që herën e parë, miq e kolegë të muzikës shqiptare, më kanë thënë se di të këndoj.
– Me cilën nga këngët e tua ndihesh më i lidhur?
– Më i lidhur jam me këngën time të parë “Mos harroni Shqipërinë” ndoshta ngaqë ka qenë ajo që më ka njohur me publikun.
– Ndërkohë, më the që po punon me disa projekte…
– Po, me tre projekte. Njëra është një këngë popullore me tekst të Armand Trebickës dhe dy i përkasin muzikës së lehtë. Bashkëpunëtorët e mi janë: në klarinetë Ervis Rapaj, orkestrim Vani Rushiti dhe këngët e lehta, si teksti, ashtu edhe orkestrimi, janë nga Vani Bica.
– Pse bashkëpunove pikërisht me këta producentë?
– Kam përzgjedhur pikërisht këta emra sepse edhe bashkëpunoj në evente të ndryshme ku shkojmë dhe punojmë.
– Cila është mbështetja jote më e madhe?
– Mbështetja ime është familja dhe publiku, që dua t’i falënderoj sepse më bëjnë të ndihem kaq mirë!
– Në një kohë dhe në një treg të tillë si tani, ku gjithçka është materializëm, a ka ende këngëtarë të mirëfilltë?
– Mund të mos jenë shumë, ama ka akoma këngëtarë të mirëfilltë.
– Je njeri që të pëlqejnë ndryshimet?
– Të them të vërtetën, më shumë më pëlqejnë ndryshimet në profesion, për t’u përmirësuar…
– Je i lodhur nga nata, meqë ti ke vite qe këndon live?
– Jeta e natës është e lodhshme, por duke qenë në kontakt me publikun ndihesh shumë mirë dhe kalon edhe lodhja.
– Me cilin këngëtar apo këngëtare do të doje të kishe një bashkëpunim?
– Kam shumë dëshirë që të bashkëpunoj me një nga zërat më të bukur të muzikës shqiptare Eli Farën ose me Aurela Gaçen.
– Ndonjë gjë për të shtuar? Harruam gjë?
– Na ka ngelur ende shumë për të thënë, por do të takohemi përsëri, pasi të nxjerrim këngët e reja për publikun. Respekte. Andrea.
