Arlis Alikaj – Rovena, më në fund, ua gjete ilaçin edhe beqarëve në këngën tënde të re “Ilaçi i beqarit”…
Rovena Ibrahimi: – Në fakt, unë jam munduar ta bëj këtë qëkur këndova “Kush do që të marrë grua”. (Qesh) Nga atje e deri tek “Ilaçi i beqarit”, do t’i martoj të gjithë sepse të gjithë beqarët e kanë nga një ilaç. Vetëm duhet ta gjejnë.
– “Për gjumin që të ka dalë, bëj durim e pritë o djalë, pritëm pritëm”, thua ti… E sa duhet të presë ky i shkreti?
– Të presë sa të dalë dita, si fillim… (Qesh)
– “E mira vjen ngadalë”… edhe në jetën reale të Rovenës?
– E mira vjen gjithmonë ngadalë, në jetën e secilit prej nesh… Unë, në përgjithësi, mundohem shumë për gjërat që bëj në jetën time, ndaj mendoj se edhe tek unë, e mira vjen ngadalë. Ama, as unë vetë nuk nxitoj.
– Në fund, ilaçi i beqarit i bën derman djalit?
– Po, përderisa vendos të vishet dhëndërr, them se po.
– Në pak ditë, kënga ka arritur mijëra klikime dhe shumë shpërndarje. Duket se ke goditur në shenjë me këtë video…
– Ju falënderoj për vëmendjen e kushtuar, por di të them me bindje që kemi punuar shumë, ndaj falenderimet shkojnë për autorin e tekstit Nexhip Seraj, kompozitorin Adrian Hila, si dhe produksionin Max, për realizimin e videoklipit. Asgjë nuk arrihet vetëm.
– Rovena, çfarë ka ndodhur në jetën tënde që nga intervista e fundit që kemi bërë së bashku?
– Sapo kam lançuar këngën time më të re (buzëqesh), e cila realisht më ka marrë shumë kohë. Pastaj, koncerte brenda e jashtë vendit, si dhe puna e përditshme në teatrin “Petro Marko”. Të tjera të reja nuk ka pasur.
– Shumë e kërkuar je… Para disa muajsh ishe në Australi, këtë muaj do të jesh me emigrantët shqiptarë në Itali… Çfarë të bën kaq të pëlqyer?
– Unë mendoj se duhet t’i pyesim ata për këtë gjë, po di të them se unë vetë ndihem shumë mirë mes shqiptarëve që jetojnë jashtë atdheut dhe them se këngët popullore janë pjesë e pandashme e jona. Kjo mund të jetë një arsye.
– Cili nga shtetet ku ke udhëtuar nëpër koncerte, të ka mbetur më shumë në mendje dhe pse?
– Në çdo shtet që ne shkojmë, gjejmë një Shqipëri të vogël, por nuk do t’i heq asnjëherë nga mendja koncertet me shqiptarët e Australisë. Atje larg, ata njerëz kanë ruajtur vlerat edhe traditat tona më të mira. Mikpritja e tyre pastaj, nuk lë më vend për koment.
– Rovena, je e hapur për bashkëpunime me këngëtarët e rinj, edhe duke i ndihmuar për të bërë përpara apo je skeptike për efektin që do të kishin këto bashkëpunime në imazhin tënd?
– Unë, kur bëhet fjalë për imazhin tim, jam skeptike dhe mendoj se është normale nëse do të ruash figurën tënde të krijuar me shumë kujdes, por nuk do ta refuzoja kurrë një bashkëpunim me një këngëtar të ri vetëm sepse nuk ka famë. Ama, niveli profesional duhet ta justifikojë bashkëpunimin me çdo kusht…
– A ndikon personi zemrës në muzikën tënde?
– Personi i zemres është frymëzim për mua. Patjetër, madje jam me fat që ai ndikon tek unë.
– Rovena, vera është përpara… Ke gjetur pak kohë për pushime këtë vit, midis dasmave të shumta ku do të këndosh?
– Gjatë verës për ne, pushimi është luks, por fatmirësisht, jetoj në Vlorë… (Buzëqesh)
– Në Vlorë i bën gjithmonë pushimet?
– Në fakt, mes datave të koncerteve jashtë Shqiperisë pothuaj gjithmonë përfitoj të bëj edhe pak ditë pushimi jashtë Vlore.
– Si po shkon puna në teatrin “Petro Marko” të Vlorës? Çfarë pjese ke luajtur kohët e fundit?
– Mes kolegësh të mrekullueshëm gjithçka shkon mirë. Së fundi kemi filluar shfaqjen e varietesë më të re me regji të Afrim Agalliut ku natyrisht, nuk mungon as “Ilaçi i beqarit”. Falënderoj publikun vlonjat që nuk mungon në shfaqjet e trupës së varietesë.
– Rovena, e mendon ndonjëherë t’i rrish larg punës për disa kohë?
– Unë nuk marr frymë larg punës e jo më të rri për disa kohë pa të. Muzika është jeta ime!
– Në përgjithësi, i menaxhon vetë apo dikush tjetër aktivitetet e tua?
– Unë vetë menaxhoj gjithçka, ndonëse kjo është shumë e lodhshme.
** Rovena dhe Vera**
– Nëse do të ishe një lule, cila do të doje të ishe?
– Ekziston një lloj trëndafili që quhet “Sofia Loren” dhe që lulëzon 12 muaj. E kam shumë për zemër.
– Të ka krahasuar dikush me një frut?
– Mendoj se të gjitha femrat marrin komplimente të tilla…
– I përdor në veshjet e tua elementet e verës, si: frutat, lulet, petalet, natyrën?
– Patjetër që po. Më shumë se kurrë në videoklipin e fundit, meqë janë edhe shumë në modë.
– A është pranvera stina jote e preferuar?
– Po, sepse pas një dimri që do ta përkufizoja “të zymtë”, gjithçka fillon të marrë jetë.
– Fruti yt i preferuar…
– Vdes për qershitë!
– A i konsumon shpesh frutat?
– I konsumoj shumë, por jo vetëm frutat; edhe lëngjet e freskëta… Këto të fundit, falë mamasë sime.
** Më shumë rreth teje…**
– Rovena, fansat janë shumë kuriozë për personin përkrah teje… cilës fushe i përket, si u njohët?
– Ne jemi njohur në universitet. Studionim bashkë në të njëjtën degë, në departamentin e Gjuhëve të Huaja. Ai vazhdon në fushën e mësuesisë e te përkthimeve, pra, nuk ka lidhje me muzikën, ndonëse më mbështet në çdo hap. Jemi bashkë prej rreth 9 vitesh.
– Të shohim shumë aktive me videoklipe. Shpenzimet i mbulon vetë?
– Shpenzimet i mbuloj të gjitha vetë, edhe pse është vërtet e vështirë të sjellësh këngë dhe videoklipe cilësore.
– Ndjen konkurrencë në këtë fushë?
– Konkurrencë ndjen çdo njeri, por është një ndjenjë që të bën gjithmonë të kërkosh e të nxjerrësh më të mirën nga vlerat e tua.
– Të kthehemi pak në kohë… Në vitin 2014, kur u ftua një këngëtar serb në Shqipëri, ti ishe në listën e këngëtarve që nuk u prononcuan, ndërsa këngëtarët kosovarë flisnin kundër tij…
– Në fakt, nuk e di pse në mënyrë të padrejtë dhe jo korrekte shkruan në atë kohë në emrin tim. Si atëherë, edhe tani, vazhdoj të them në lidhje me këtë që arti dhe muzika nuk munden kurrë të ndajnë kombet, por vetëm të shërbejnë si ura lidhëse ndërmjet tyre.
– Më shumë fitime nxjerr nga fusha e muzikës apo nga teatri?
– Unë jetën time ia kam kushtuar totalisht muzikës, kështu që gjithçka lidhet me të.
– Diçka që e mërzit shpejt Rovenën…
– Më mërzit shumë padrejtësia, jo vetëm në drejtimin tim, por edhe ndaj të tjerëve dhe, si natyrë idealiste që jam, reagoj menjëherë.
