Shkencëtarët francezë kanë arritur në përfundimin se shampanja e ruan më mirë shkumën dhe flluskat, në rast se ajo do të serviret më e ngrohtë sesa është bërë zakon dhe pikërisht, pra, në temperaturën 18 gradë celsius. Para së gjithash, shkencëtarët kanë sqaruar se një gotë shampanjë ka afërsisht një milion flluska të vogla që përbëjnë shkumën e saj dhe specialistët kanë vënë re se ato janë shumë të rëndësishme për shijen e shampanjës. Duke plasur, flluskat çlirojnë acid karbonik dhe ngacmojnë gjendrrat e shijes në gojë. Veç kësaj, mijëra flluska të tjera pëlcasin kur mbushim gotat dhe përhapin në ajër aromën e tyre origjinale dhe të këndshme. Rëndësi për të ruajtur flluskat ka edhe mënyra se si e hedhim shampanjën në gota. Është mirë që gotën ta mbajmë të përkulur pak anash. Kështu, do të ruhen pa u plasur gjersa ta pimë, mijëra flluska, të cilat do të përhapin pastaj në gojë shijen e pijes së këndshme. Ndërkaq, duke këshilluar që shampanja të mos pihet e ftohtë, shkenëtarët janë të mendimit se temperatura e saj nuk duhet t’i kalojë në asnjë mënyrë të 18 gradët. Ju kujtojmë me këtë rast se shampanja është një pije shumë e dobishme, pasi përmban polifenol, një substancë bimore që zgjeron enët e gjakut.
Advertisement