Ajo ka thënë aq shumë gjëra për jetën e saj, sa duket sikur ka thënë gjithçka, por nuk është ashtu! Në këtë intervistë, si asnjëherë më parë, Anjeza na flet për “fiksimet” e saj, sa e fiksuar është pas sendeve, supersticioneve, veshjeve e gjithçka tjetër. Anjeza Branka, si kurrë më parë, në gazetën “Intervista”!
Fabjola Kuburi: – Anjeza, premton t’u përgjigjesh të gjitha pyetjeve me sinqeritetin më të madh?
Anjeza Branka: – Jam përgjigjur ndonjëherë ndryshe?! (Buzëqesh)
– Çfarë quan ti fiksim?
– Ah, e kuptova, doni të më zbuloni edhe ato pak gjëra që nuk kam zbuluar ende, apo jo?! Fiksim quaj kur e do diçka me patjetër… dhe e merr.
– Çfarë mund të ketë dikush tmerrësisht fiksim?
– Gjithçka që i pëlqen, por pa dëmtuar të tjerët për ta arritur.
– Është bukur të fiksohesh pas diçkaje, apo ndonjëherë, kjo mund të ketë rezultate negative?
– Eh, fiksimi ndonjëherë mund të sjellë edhe probleme, mund të të çojë në situata që nuk i kishe menduar më përpara, por këto janë pasojat e fiksimit.
– A është Anjeza e fiksuar, kur dashuron?
– Jo, përkundrazi, jam shumë e kuptueshme dhe sigurisht, kërkoj mirëkuptim.
– Je supersticioze, fiksohesh pas gjërave që të ndodhin gjatë ditës?
– Po, jam, por jo aq shumë sa të fiksohem pas gjithçkaje.
– Janë më fiksim djemtë shqiptarë apo të huajt?
– Nuk e di, ndoshta secili ka diçka që e bën fiksues, pavarësisht nëse është shqiptar apo i huaj.
– Çfarë duhet të fiksojmë për karakterin e Anjezës?
– Që jam e fiksuar pas sinqeritetit, që nuk gënjej dhe që do të doja që ky sinqeritet të më kthehej.
– Shoh që vishesh vazhdimisht me gusto. Je e fiksuar pas veshjeve firmato apo mjafton që veshja të jetë e bukur dhe të të shkojë?
– Unë jam e fiksuar pas gjithçkaje të bukur, mjafton të më shkojë, nuk e kam problem të jetë firmë me patjetër.
– Po pas parasë, je e fiksuar?
– Nuk më kanë munguar ndonjëherë, që të jem e fiksuar tani. As kemi shumë, por as na mbarojnë. (Buzëqesh)
– Të është ngulitur ndonjëherë ndonjë gjë aq keq në mendje, sa të është kthyer në fiksim dhe mezi e ke hequr?
– Udhëtimet i kam fiksimin që akoma nuk e kam hequr dhe nuk besoj se do ta heq ndonjëherë. Janë gjëra që i bëj me shumë qejf dhe nuk më bezdisin. Kanë pak lodhje, por kënaqësia e justifikon lodhjen.
– Të kanë ndihmuar prindërit me para, apo ia ke dalë gjithnjë mbanë vetë?
– Ta thashë edhe pak më lart, unë vij nga një familje që ka qenë gjithmonë mirë ekonomikisht dhe sigurisht që në fillimet e mia, ndihma kryesore kanë qenë prindërit. Më pas fillova të punoja dhe mësova t’ia dilja vetë.
– Je e fiksuar pas rrotacionit, pra, e bën një gjë herë pas here, edhe pse mund të jetë gabim?
– Jo, nëse diçka është gabim dhe gabova herën e parë, nuk ka kuptim që të bëhet përsëri. E kam fjalën gjithmonë për gjëra që nuk kanë të bëjnë me ndjenjat.
– Fiksohesh më shumë pas një arome parfumi apo pas një fustani?
– A mund të përgjigjem: të dyja?! Po, po, pas të dyjave fiksohem!
– Lojërat e shkathtësisë apo koleksionimi i pullave?
– Nuk jam e fiksuar pas asnjërës.
– Ping-pongu apo tenisi?
– Nuk jam e fiksuar, por të dyja më pëlqejnë mjaftueshëm.
– Fluturimi me parashutë apo motorat e ujit?
– Motorat e ujit, pa dyshim.
– Kukullat barbi apo kutitë e tualetit?
– Kur isha e vogël kisha shumë kukulla dhe i koleksionoja, por edhe kutitë e tualetit i kam pasur fiksim.
– Ke fiksim të bësh apo të të bëjnë foto?
– Fotografia është një nga pasionet e mia më të mëdha. Kam fiksim të bëj shumë foto ku objektivi të jem unë, por edhe të bëj. Pse jo, është bukur të kapësh imazhe të bukura.
– Ke fiksim të puthësh apo të të puthin?
– Varet, por më shumë të puth. (Buzëqesh)
– Je e fiksuar pas medias së shkruar apo pas asaj televizive?
– Kam qenë shumë e dashur më gazetat, televizionet dhe gazetarët. Pyetini dhe do t’ju tregojnë. Unë i respektoj të gjitha mediat sepse më kanë respektuar dhe kanë qenë të dashur me mua, sikundër unë ua kam kthyer dashurinë duke qenë gjithmonë e gatshme për ta.
– Cili vret më shumë, fiksimi apo dashuria?
– Kam përshtypjen që fiksimi. Dashuria rilind, nuk vret.
– Je e fiksuar pas yjeve apo lë realitetin të veprojë?
– Nuk jam e fiksuar, por më pëlqen ta lexoj horoskopin. Të jep njëfarë ndjesie pozitive.
– E fiksuar pas lojërave të fatit?
– Jo, nuk kam qenë asnjëherë.
– Po pas Facebook-ut?
– Jam aktive, por jo e fiksuar.
– Ke qenë e fiksuar pas notave të mira, apo ishe nxenëse mesatare?
– Kam qenë e fiksuar pas notave të mira sepse kam qenë vërtet një nxënëse e mirë.
– E fiksuar pas pabeve apo lokaleve me muzikë live?
– Janë pjesë e punës time, nuk është punë fiksimi këtu.
– Çfarë duhet të fiksojë publiku te muzika që ti këndon?
– Atë që ka fiksuar për kaq vite; që unë këndoj për publikun, jam me ta dhe për ta, gjithmonë.
– Aktualisht, ku je e fiksuar në projektet e tua?
– Atje ku kam qenë fiksuar gjithmonë, të sjell sa më shumë këngë që publiku im t’i pëlqejë, t’i këndojë, t’i kërcejë dhe t’i fiksojë për një kohë të gjatë.
– Është më mirë të fitosh një llotari apo një konkurs muzikor?
– Më mirë një festival! Llotaria është e përkohshme, kurse festivali është një ndjesi që lë gjurmë dhe shije shumë të mirë për shumë kohë.
– Kënga për ty është profesion, pasion apo stil jetese?
– Është pasion që u kthye në një profesion, që më solli këtë stil jetese që kam dhe po jetoj.
– Cilat janë gabimet që nuk do të doje t’i përsërisje më në dashuri?
– Nuk besoj se ka një recetë që ndiqet në dashuri. Gjërat ndodhin dhe kaq. Mund t’i marrësh me sportivitet, por kaq.
– Mendon se meshkujt kanë më shumë fiksim këngët e tua apo trupin tënd?
– Është pyetje për meshkujt kjo, jo për mua! (Buzëqesh)
– Në dashuri je po kaq dominante sa në këngë?
– Jam tip dominant dhe për aq kohë sa dominoj në këngë dhe ia kam arritur më së miri… Mendoje pastaj në dashuri! (Qesh)
– Cili ka qenë komplimenti më i bukur që të kanë bërë?
– Do të doja shumë të veçoja, por janë kaq shumë, sa nuk di ç’të zgjedh. (Buzëqesh)
– Po vërejtja?
– Kam qenë gjithmonë e mendimit që kritikat dhe vërejtjet ndikojnë për mirë, kudo qofshin, kështu që i kam mirëpritur.
– Çfarë të mërzit më shumë?
– Kur mundohen të më hedhin hi syve.
– Çfarë do të bësh nesër, ndonjë gjë që të ka ngelur fiksim?
– Zakonisht, nuk kam fiksime, por dëshira që i bëj realitet, por edhe po pata ndonjë fiksim, të jeni të sigurt që do ta heq. Të zgjohemi nesër, pa shohim e bëjmë!
