– Doktoreshë Rezarta, së pari, ju përshëndes. Jam Nikolini dhe vuaj nga miopia. Prej kohësh mbaj syze. Syrin e djathtë e kam me numër 12 dhe syrin e majtë, me numër 10. A ndikon mbajtja e syzeve për një kohë shumë të gjatë në rritjen e numrit? Kam frikë të bëj operacion me lazer, edhe pse doktori ma ka rekomanduar një gjë të tillë. Dua të vazhdoj të mbaj syze. A do të jetë e dëmshme nëse i mbaj syzet edhe për disa vjet të tjera, pavarësisht se nuk i dua fare? Jam 25 vjeç.
Dr. Rezarta Shkurti, okuliste: – I dashur Nikolin! Nga letra juaj e shkruar unë kuptoj që ju vuani nga një defekt shikimi, i cili është i lindur dhe quhet Myopia Alta. Ky defekt shikimi është gjithmonë i pranishëm në trupin tuaj, pasi ka të bëjë me faktin që boshti optik i syrit tuaj është më i madh sesa norma dhe figura nuk arrin të fokusohet në retinë në qendrën e të parit, por shumë më përpara. Ju keni lindur me këtë defekt shikimi. Që në fëmijërinë tuaj e keni patur shikimin të dobët për larg, i afroheshit shumë televizorit ose e afronit shumë çdo objekt për të parë. Që në krijimin tuaj si fëmijë, embrion dhe fetus në mitrën e nënës suaj, sytë tuaj janë krijuar me bosht optik më të gjatë sesa norma. Ky defekt në përgjithësi është i trashëguar dhe ndoshta po të merrni një pyetësor në lidhje me të afërmit tuaj, ose nga nëna ose nga babai, do të kishte ndonjë të afërm me defekt si ju.
– Përsa i përket pyetjes suaj nëse do të ndikojë për keq në sytë tuaj mbajtja e syzeve apo jo, unë po ju them të kundërtën, që mbajtja e vazhdueshme e syzeve parandalon mundësinë e rritjes së numrit. Ndërsa përsa i përket faktit që ju nuk i pëlqeni syzet, por jeni i detyruar t’i mbani ato, kjo nuk përbën më problem në praktikën okulistike, pasi tashmë kanë dalë rëndom në qarkullim lentet e kontaktit, që janë mjete mjekësore të cilat aplikohen mbi xhamin e syrit, ngjiten në të dhe realizojnë shikimin jo vetëm të barabartë me syzet, por diçka edhe më të mirë se syzet. Kjo, pasi lentet e kontaktit janë struktura të vendosura direkt mbi xhamin e syrit dhe distanca midis xhamit të syzes dhe syrit në rastin tuaj kur jeni me syze neutralizohet fare dhe bëhet zero dhe shikimi me lente është më i plotë dhe me fushëpamje më të plotë se me syze. Lentet mund t’i porosisni tek Optika Union që gjendet në kryqëzim të 21 dhjetorit, pranë Kolegjit Turk. Përsa i përket ndërhyrjes me lazer, nuk përjashtohet mundësia për miopinë në rastin tuaj, por më duken zgjedhje më komode, me më pak pasoja dhe me më pak shpenzime syzet dhe lentet e kontaktit. Ju falënderoj për letrën.
