Si i ndihmon joga, marrëdhëniet seksuale

“Joga është jo vetëm një lehtësues i mahnitshëm stresi, por shërben gjithashtu për të përmirësuar fleksibilitetin, shtuar qarkullimin e gjakut dhe “zgjeruar” zemrën, funksione këto të nevojshme për një jetë të nxehtë seksuale. Prandaj të gjitha studimet arrijnë në përfundimin se joga mund të përmirësojë cilësinë dhe sasinë e orgazmave tuaja”, thotë Enkelejda Çelniku, specialiste e shëndetit të gruas… Veç kësaj, joga ju ndihmon të njihni më mirë trupin tuaj, të përqendroheni dhe shijoni më mirë momentet e kënaqësisë seksuale…

– Si ndikon konkretisht joga në kënaqësinë seksuale?

– Së pari, joga ndihmon në forcimin e muskujve të jashtëm e të brendshëm të zonës intime. Dihet se gjatë seksit vihen në lëvizje një sërë muskujsh që kanë të bëjnë me kënaqësinë seksuale. Sa më të fortë e zhvilluar të jenë ata, aq më e madhe është edhe kënaqësia që ndjen në një marrëdhënie. Rëndësi të madhe kanë veçanërisht muskujt e legenit, që duhet të jenë shumë në formë…

– Në kënaqësinë seksuale kanë të bëjnë edhe pozicionet e ndryshme. Ndihmon joga për këtë?

– Po, joga ju ndihmon të provoni qëndrime të reja dhe më të guximshme që sjellin edhe një orgazëm më të fortë. Ajo ju ndihmon sidomos për shtimin e fleksibilitetit, që të lëvizni më mirë dhe të provoni gjëra të reja.

– Thuhet se joga ndihmon edhe në anën psikologjike…

– Po, ajo ndikon në përmirësimin e besimit në vetvete dhe ju bind se jeni të afta të përmbushni kërkesat e partnerit tuaj. Kur ju ndjeheni mirë me trupin tuaj, e transmetoni këtë energji edhe te partneri. Edhe ai ndjehet më mirë, më i sigurt dhe provon një seks më të natyrshëm, me dëshirë dhe fantazi. Studimet e fundit në fushën e jogës thonë se me anën e jogës, besimi në vetvete dhe në aftësitë e trupit tuaj mund të arrijë në maksimum.

– A mund të na sugjeroni disa ushtrime?

– Me kënaqësi. Do t’ju tregoj disa ushtrime te thjeshta, por që do t’jua ndryshojnë jetën seksuale. Dua ta theksoj se këto ushtrime mund t’i kryeni vetëm, por e mira është që t’i kryeni me partnerin tuaj. Kjo do të ishte fantastike!

Ushtrimi i parë: Marjaryasana (Macja)

1. Uluni me duar e këmbë në tokë, me duart e hapura sa gjerësia e shpatullave.
2. Ngadalë krijoni një hark mbrapa duke i dhënë trupit sa më lart të jetë e mundur. Kurrizi, pra, duhet te ketë pamjen e një harku. Dalëngadalë uleni kurrizin në pozicionin normal.
3. Këmbët qëndrojnë të lirshme me majat në dysheme. Vithet gjithashtu duhet të jenë të lirshme. Ulni gjoksin drejt dyshemesë dhe harkojeni trupin nga poshtë. Tani kurrizi juaj ka pozicionin e kundërt me atë që kish më parë. Përsëritini këto ushtrime gjashtë herë. Me kalimin e kohës, edhe harku do të jetë më i madh, sepse trupi do të ketë fituar më shumë elasticitet. Ky ushtrim ju forcon muskujt që janë aktivë gjatë orgazmës.

Ushtrimi i dytë: Adho Mukha Svanasana (Fytyra e qenit)

1. Filloni me duart dhe këmbët e mbështetura në tokë. Mund të filloni duke u shtrirë në dysheme dhe në vazhdim, të ngriheni. Krijoni midis këmbëve një hapësirë afro 10 cm.
2. Ngrijini të pasmet lart derisa trupi juaj të marrë formën e një V-je me kokëposhtë. Edhe duart kanë të njëjtën hapje si këmbët.
3. Drejtojeni kurrizin që ai të jetë në një vijë të drejtë, duart (pesha të shpërndahet te gishtat) dhe në vijim drejtoni gjunjët e këmbët sa të mundeni. Nëse nuk mund ta bëni që në fillim këtë ushtrim me këmbë, atëherë mbështetni gjunjët në tokë.
4. Butësisht tërhiqni barkun dhe ngrini sa më lart vithet (krijohet ndjesia sikur dikush e tërheq trupin sipër). Koka mund të qëndrojë në mënyrë të tillë që sytë të shikojnë kërthizën ose majat e këmbëve. Në këtë mënyrë, shikimi juaj përqendrohet i gjithi te ju. Është një procedurë çlodhëse. Qëllimi është të gjesh paqen në vetvete, në mënyrë që ushtrimi të mos duket si sforcim i madh, por ai në fakt ju ndihmon të nxehen dhe forcohen muskujt.

Ushtrimi i tretë: Vrksassana I (Pema)

1. Gjeni ekuilibrin e trupit të mbështetur në të dyja këmbët, drejtojeni trupin dhe jini të përqendruar.
2. Me dorën e djathtë vendosni shputën e këmbës së djathtë në pjesën e brendshme të kofshës së majtë (jo mbi gju, ose mbi kyç, duhet ta vendosni ose më sipër gjurit ose, nëse nuk mund të mbani ekuilibrin më poshtë gjurit, por kurrë mbi kyç). Në vazhdim, hapni anash gjurin e djathtë. Sigurohuni që legeni qëndron drejt përpara, domethënë, që trupi është në ekuilibrin e duhur.
3. Bashkojini duart para gjoksit në pozicionin e lutjes. Mund t’i përqendroni sytë në një objekt të afërt. Qëndroni kështu për një minutë të plotë, ose për aq kohë sa mundeni. Ulni ngadalë duart, në vazhdim edhe këmbën. Përsëriteni këtë ushtrim edhe me këmbën tjetër.
4. Vazhdoni me pozicionin e pemës si herën e parë. Kësaj radhe, ngrijini krahët lart me pëllëmbët e kthyera përballë njëra-tjetrës. Krahët duken si degët e një peme, të forta dhe të qëndrueshme. Ky ushtrim ndihmon për krijimin e gjetjen e ekuilibrit brenda vetes.

Ushtrimi i katërt: Bandhokonasana (Flutura)

1. Në pozicion të ulur, bashkoni thembrat e këmbëve dhe vendosni duart mbi këmbë.
2. Tani përkuleni trupin përpara aq sa të mundeni dhe qëndroni kështu deri në 15 sekonda. Ky ushtrim bën më elastike zonën e mesit dhe rrit elasticitetin edhe në kyçet e legenit, për të përmirësuar lëvizjet.

Ushtrimi i pestë: Uttihita Chaturanga Dandasana (Dërrasa)

1. Ashtu si në rastin kur filloni të bëni pompa, mbështetni në dysheme majat e këmbëve dhe duart, të hapura në gjerësinë e supeve. Hapini mirë gishtat e duarve, që të shpërndahet pesha dhe presioni te gishtat e jo te kyçet.
2. Këmbët, vithet, shpina, barku, supet, qafa dhe koka duhet të jenë në një linjë të gjatë dhe të drejtë. Kontrolloni në një pasqyrë nëse mundeni.
3. Mbajeni këtë pozicion për 30 sekonda dhe pastaj pushoni. Përsëriteni 3 herë.

Ky ushtrim forcon muskujt e ndryshëm kryesorë për të mbajtur trupin tuaj në formën e duhur. Jo vetëm jeni në formë të mirë për partnerin tuaj, por ju do të ndjeheni më mirë edhe në vetvete.

Ushtrimi i gjashtë: Setu Bandha Sarvangasana (Ura)

1. Shtrihuni në shpinë me gjunjë të përthyer. Mbajini këmbët rreth 15 cm të larguara nga njëra-tjetra.
2. Duke u mbështetur te shputat e këmbëve, shtyjeni belin në drejtim të tavanit.
3. Duart tuaja mund të jenë të lira ose gishtat të mpleksur me njëri-tjetrin. Vazhdoni të shtyni belin drejt tavanit sa të mundeni.
4. Mbajeni kështu për 60 sekonda dhe zbriteni trupin dalëngadalë me kujdes, duke i dhënë kohë të zbresë. Ky ushtrim forcon muskujt e gjoksit, shpinën tuaj dhe shton elasticitetin.