Këtë verë, më prisni në Shqipëri
Miq të gazetës “Intervista”! Pas shumë tentativash për të bërë një intervistë me të për gazetën tonë, më në fund BeBe Rexha u përgjigj, duke na zgjedhur si median e parë shqiptare për të cilën jep një intervistë…
Ndihemi të privilegjuar që BeBe-ja e vlerësoi kërkesën tonë dhe gjeti kohë të kthejë përgjigjet për të gjithë fansat shqiptarë që ajo i ka shumë për zemër, në një periudhë shumë të zënë për të, vetëm pak përpara se të lançonte këngën e saj më të re me Niki Minaj. Ju urojmë lexim të mbarë të intervistës të divës në rritje në arenën e muzikës botërore…
Arlis Alikaj: – Be-Be, më përpara quheshe Bleta. Pse e ndryshove emrin?
BeBe Rexha: – Emrin Bleta ma vendosi gjyshja ime në Maqedoni, tek e cila kalova pjesën më të madhe të fëmijërisë sime. Ajo kishte një punishte bletësh dhe ishte aq e dhënë pas tyre sa u dedikoi jetën e saj. Ajo ma ka vënë dhe emrin Bleta, një emër të veçantë, që nuk e kishte njeri në zonë. Mirëpo, unë jetoj në Amerikë prej shumë kohësh dhe është shumë e vështirë të shqiptohet “l-ja”. Këtu, “l”-në e shqiptojnë “ll”, kështu që më thërrisnin Blleta. Pasi u integrova në jetën amerikane, mendova ta bëja emrin Be-Be, pasi edhe në anglisht bletës i thonë “bee” dhe unë thjesht bëra disa modifikime, pa harruar historikun e emrit tim.
– A ndihesh si bebe kur të thërrasin BeBe?
– Uau, “Oh my God!” (o Zot) poooo! Vërtet që ndihem si bebe, sidomos tani që po më pyesni edhe ju. (Buzëqesh)
– Ky ndryshim i emrit, urojmë të mos të të ketë larguar edhe nga identiteti shqiptar…
– Në asnjë mënyrë. Mund të largohem fizikisht nga trojet shqiptare, por në venat e mia rrjedh gjaku shqiptar.
– Flet shqip?
– Po, flas shqip… Do t’ju tregoj edhe një sekret, por mos e ndani në publik…
– Sekret? Çfarë sekreti?
– Kam harruar shumë fjalë shqip! (Qesh)
– Duke parë bukurinë tënde, nga e mendojnë amerikanët origjinën tënde?
– Nuk e di. Duhet të pyesni miqtë e mi amerikanë për t’iu përgjigjur pyetjes suaj.
– Si reagojnë kur u thua se je shqiptare?
– Shumë prej tyre nuk reagojnë fare, pasi nuk e dinë ku është Shqipëria, ose nuk kanë dëgjuar kurrë më parë për të. Por, pasi unë bëj simbolin e shqiponjës me duart e mia dhe u tregoj për veten, ata shohin në hartë dhe sigurisht, duan të dinë më shumë rreth vendit tim.
– Cili është sekreti i bukurisë tënde?
– Nuk kam ndonjë sekret për këtë. Unë ndihem mirë ashtu siç jam. Sigurisht që bëj gjërat që bën çdo vajzë tjetër, shkoj në qendra bukurie, bëj tualet, e mbaj veten, por më e rëndësishmja nga të gjitha, thjesht ndihem e bukur për brenda dhe këtë e reflektoj jashtë.
– Po i trupit të përsosur që ke?
– (Qesh) Nuk e dija të kisha një trup të përsosur, tani po e mësoj, që po ma thoni ju! Ky ishte një kompliment, kështu që faleminderit. Nëse trupi im është i përsosur, është ndoshta sepse eci shumë dhe frekuentoj po kaq shumë palestrën.
– Një Bebe duhet të jetë singëll, apo jo?
– Sapo kam publikuar këngën time audio me Niki Minaj: “Nuk ka më vajza me zemër të thyer”, kështu që kalojmë te pyetja tjetër. (Buzëqesh)
– Si iu fute rrugës së muzikës?
– E nisa udhëtimin e karrierës sime muzikore si tekstshkruese për artistë të tillë si: PussyCatDolls, Snop Dog, etj., por deri atëherë nuk kisha kënduar vetë, përveçse në koret e shkollës sime. Më pas nisa të bëja zërat dytësorë në disa albume këngëtarësh, derisa dola solo. Por, dua t’ju them se nuk ka qenë e lehtë. Kam arritur këtu ku jam sepse unë mund të këndoj profesionalisht.
– Si është një ditë e zakonshme e BeBe Rexhës?
– Një ditë e imja normale është: Studio – Studio – Studio. Do të shqetësohesha nëse do të ishte ndryshe! (Qesh)
– BeBe, çfarë ke qejf të bësh në kohën tënde të lirë?
– Vetëm të dal me miqtë e mi, të bëj sërf ose shëtitje me motorr jashtë qytetit.
– Kurioziteti i shumë fansave të tu nga Shqipëria është nëse ti do të këndosh ndonjëherë në shqip…
– Unë këndoj shqip shumë herë kur jam vetëm. Në dhomën time kam një flamur të madh kuq e zi dhe disqe të tëra me këngë të vjetra shqipe si “Xhamadani vija-vija” etj. Kam marrë disa oferta për të qenë në Shqipëri për verën e vitit 2016 nga një kompani celulare që ka kontaktuar me menaxherët e mi dhe jemi akoma në bisedime. Deri atëherë do mësoj mirë një këngë e ta sjell në versionin tim. Kështu që, më prisni!
– Ti, sapo ke mbyllur bashkëpunime me Eminem, Niki Minaj, Rihanna… Me cilin emër të madh është bashkëpunimi i radhës?
– Në fakt, këta janë ndër emrat më të mëdhenj. Unë gjithashtu kam qenë në koncerte me Elton Xhonin dhe kam hapur shfaqjet e tij. Ato momente përpara miliona njerëzve në super koncerte më kanë emocionuar shumë… Emri i madh me të cilin mund të bashkëpunoja tani do të ishte: Vetja ime. Tani që jam konsoliduar mirë, do të eci solo.
