Kaso Kosa: – Si po shkon ekonomia, zoti Braçe?
Erjon Braçe: – Fëmijët e Saliut janë të korruptuar… E di, Kaso, edhe pse ministrat tanë bëjnë korrupsion, prapë më të korruptuar se fëmijët e Saliut nuk ka!
– Zoti Braçe, ju pyeta për ekonominë, jo për Salinë.
– Kaso, unë nuk mund të flas për ekonominë, përderisa kam gjallë Salinë…
– Unë, në fakt, desha një mendim nga ju si kryetar i Komisionit të Ekonomisë në Parlament. Si është gjendja ekonomike?
– Berisha na ka lënë një ekonomi rrumpallë, Kaso, një ekonomi që funksiononte vetëm për kalamajtë e tij… Ça pret ti Kaso nga një njeri si Berisha?! Merr vesh doktori nga ekonomia?
– Nuk merr, por as piktori nuk merr, apo jo, zoti Braçe…
– Piktori më ka mua, Kaso… Unë, si ekonomist, i jap direktivat dhe ai i shpërndan… Ke Facebook ti Kaso? E ke parë si e kam bërë Divjakën, unë? Nga gjithë bota vijnë në Divjakë e në fshatrat rrotull për të marrë përvojë bujqësore…
– Jo, nuk jemi miq bashkë në Facebook zoti Braçe… Po ti, ku merr vesh nga bujqësia? Ke lindur e je rritur në qytet, shkollën e ke bërë për ekonomi industriale…
– Kam luajtur Farmeville në Facebook, unë, Kaso. S’ke faj, nuk e ke parë sa pikë kam fituar unë. Jam më i miri nga gjithë deputetët…
– Pse, luani së bashku ju?
– Po ç’të bëjmë, o Kaso, gjithë ditën në seanca?! Dëgjohen ata budallenjtë kur flasin?! Me atë Facebook e Farmeville e shtyjmë kohën.
– Edhe Rama luan?
– Jo, ai pëlqen Paintbrush-in se bën piktura. Luan shpesh edhe Minecraft…
– Po Berisha?
– Berisha luan “Call of Duty”… Vdes për të vrarë ai njeri, Kaso. Po nuk vrau në realitet, vret në botën surreale…
– Po Lulzim Basha?
– Aha, ai është çun mamaje, nuk luan fare në kompjuter… Gjithë ditën e ka mendjen te Bursa e Nju Jorkut se ka vënë ca lekë aty. Vetëm atë faqe hap…
– Po Erjon Veliaj? Ç’mendim keni ju, zoti Braçe, për të? Thonë që nuk shkoni mirë…
– Emrin e ka të bukur ai, Kaso, por ashtu si jo të gjitha bletët bëjnë mjaltë, ashtu edhe jo të gjithë Erjonët janë si unë.
– Pse, si jeni ju, zoti Braçe?
– Unë jam si fand spathi, Kaso. Futem kudo. Vetëm në qeveri s’më fusin.
– Pse?
– Sepse zoti Rama nuk i ka qejf të shkurtërit. Në fakt, nuk është punë qejfi. Ai ka probleme me shtyllën kurrizore dhe i dhemb mezi kur përkul kokën. Edhe Kastriot Islamin pikërisht për këtë gjë e hoqi. Desh më hoqi edhe mua, po kishte frikë. Mua, më mirë të më kesh mik, sesa armik…
– Jeni shumë agresiv, zoti Braçe! Si shpjegohet që jeni deputeti më agresiv si në mediat sociale, ashtu edhe në Parlament? Ka lidhje me atë shprehjen “mistrec Berati”?
– Kaso, po flet si Berisha. Unë s’jam mistrec Berati, por trim Berati. Ç’faj kam unë që populli ashtu më do, mistrec?! Ç’faj kam unë që njerëzit vijnë tek unë e më denoncojnë lloj–lloj gjërash si kundër opozitës dhe kundër qeverisë?! Dhe unë kam burrërinë t’i them ato në Facebook e në Parlament…
– Zoti Braçe, cila është dita më e gezuar e jetës suaj?
– Kur më rrahën trimat e Saliut më 28 Maj 1996. Që nga ajo ditë, mbeta në politikë. E kupton ti, Kaso, sikur të mos më kishin rrahur, s’do të isha në Parlament.
– Kjo është punë fati, zoti Braçe, rrahja nuk është në dorën tuaj…
– Jo, Kaso, nuk është fat…
– Pse?
– Eh, ta dish ç‘kam hequr, Kaso, që të më rrihnin! U dilja përpara forcave speciale të më godisnin, por ata hiç. S’më godisnin dot, se isha i shkurtër dhe u shkonte grushti kot. Ndaj fillova të kërceja. Kërce unë, hop e bam ata. Hop unë e bam ata…
– Mos ka ardhur koha t’ju godasin prapë? Ti dhe Gent Strazmiri ziheni me të gjithë… Ai është rrahur nja dy herë në fakt, kurse ju, asnjëherë në Parlament…
– Mos më krahaso mua, Kaso, me atë tullac… Nuk quhen rrahje ato. Po kështu ndodh në një parti si PD-ja që nuk ka konkurrencë. Me dy shpulla që ha, bëhesh deputet. Me ato rrahje në PS nuk bëhesh dot as kryetar partie në zonë e jo më deputet…
– Po kur Albina Deda ju shau në parlement duke thënë “ty të ka lënë Zoti përgjysëm”, ju s’iu përgjigjët asaj ndryshe nga rastet e tjera kur ju kanë sharë…
– Unë i ngjaj Napoleonit jo vetëm në trup, por edhe në sjellje, Kaso. Gratë i kënaqin vetëm burrat e shkurtër, ka thënë ai. Prandaj më ngacmoi ajo. Gjuha vete ku dhemb dhëmbi. Por unë s’ia vara, as asaj e as ca të tjerave si ajo. Kaq ta bëjnë dhëmbin!
(Këtë shkrim mund ta lexoni të plotë në gazetën “Intervista”. Atë mund ta blini në të gjitha pikat e shitjes në Shqipëri si edhe në kioskat ku shitet shtypi i huaj në Greqi. Mund ta blini edhe online, vetëm për 89 cent, në: http://www.pressreader.com/albania/intervista)