– Kam blerë një apartament muajin e fundit dhe kur e mora ishte bashkë me garazhin e makinës. Apartamentin e kishin dy ortakë. Kur u vendosa në shtëpinë e re, më thotë njëri ortak, se garazhi nuk ju takon, sepse nuk e përmban akti i shitjes. Kjo gjë më ka nervozuar shumë, sepse unë kam paguar lekët dhe për garazhin. Ai më thotë nuk e ke kuptuar, por shuma ka qënë vetëm për shtëpinë, jo për garazhin. Dhe ortaku tjetër që kam bërë marrëveshjen më tha unë ju kam sqaruar, por ju si duket nuk e keni kuptuar. A mund ta ndjek këtë problem, sepse unë tani kam ardhur dhe nga jashtë, dhe nuk e di si funksionojnë gjërat në vëndin tonë. Kujt ti drejtohem? Edmondi.
– I nderuar Edmond, e kuptojmë problemin tuaj, dhe mendoj se këtë gjë mund ta zgjidhni vetëm ju gjithmonë duke u mbështetur tek letrat që keni në dorë. Kur blihet një apartament zakonisht lidhet një kontratë sipërmarrjeje, ose një kontratë shitblerjeje me pronarin e apartamentit, ose me të dy ortakët që ju flisnit në letrën tuaj. Nëqoftëse sipërmarrësi, ose shitësi ju ka thënë që në fillim që në shitje nuk përfshihet garazhi, atëherë ju nuk duhet ta lidhnit këtë kontratë. Nëse është ashtu siç thoni ju, që njëri nga ata ju ka thënë që është dhe garazhi brenda akt shitjes, atëherë ju sugjerojmë ta ndiqni këtë problem me rrugë ligjore. Merrni gjithë dokumentat që keni bërë me shtëpinë dhe kontaktoni një avokat, që ta zgjidhni në mënyrë të drejtë dhe të merrni atë çfarë ju takon me të drejtë. Pra, mund t’i drejtoheni një avokati që ta zgjidhni me rrugë ligjore padrejtësinë që u është bërë, dhe në këtë mënyrë do të shmangni dhe konflikte të tjera.
Advertisement