Midis nesh
Midis nesh një botë e akullt
Edhe ndjenja zënë në çark
Fryn si erë ky mall i plakur
E s’pushon, veç vjen përqark!
Midis nesh, një botë pa ngjyra
Ku dhe ndjenjat janë gri
Fryn ky mall që sjell fytyra
E shumë herë, bëhet stuhi…
E shumë herë bëhet i frikshëm
Bëhet zjarr që djeg në gji
Mjaft fytyra sjell çuditshëm
Por më shumë anon nga ti.
E atëherë bëhet si flutur
Kur kujtimin tënd përkund
Bota bëhet më e bukur
por përsëri mbetet pafund! Bledi Ylli
Unë të pres
Unë të pres këtu i vetëm
Tok me hënën tonë të vjetër
Dashurinë që kurrë s’e gjetëm
Unë e pres, nuk kam rrugë tjetër!
Kam edhe diellin që të donte
Që mbi ty derdhej pa metër
Ç’bukuri që të dhuronte!
Unë të pres, nuk kam rrugë tjetër!
Kam kujtimin tënd të bukur
Që të mban përherë të gjallë
Dhe pse kohë ti je e zhdukur
Unë të pres. Të pres me mall! BlediYlli
Ndjej zemren që më rreh vetëm për ty…
Perëndoi edhe dielli i kësaj dite,
Shëtisja, por s’e dija se ku…
Ashtu e veshur me fustan të kuq,
Ti më thoshe “eja këtu!”…
Ecja e ecja e nuk të gjeja dot,
Kudo ku shkoja me ndiqnin sytë e tu,
Ecja në këtë tokë të thatë,
Ti më thoshe prapë, “eja këtu!”…
E veshur me fustan mëndafshi,
E nuk dija as vetë ku shkoja ashtu.
Më pëshpërisje së bashku me erën,
Prapë me thoshe, “eja këtu!”…
Flladi i ngrohtë i dashurisë tënde,
Më djeg e më vret me ngadalësi.
Po të kërkoj me kujtesën e shpresës,
Prit dhe pak, se pranë teje po vij!
Rend e rend, ja dielli perëndoi,
Dhe lodhje nuk po ndjej kurrsesi.
Ndjej shpirtin që po më përvëlohet,
Ndjej zemrën që më rreh vetëm për ty… Luljeta Gjosha Pashollari