Sulltan Hajolli nuk di të ndalet, ndihmon me të madhe familjet në nevojë (Foto)

Mes shoqatave bamirëse që kontribuojnë fuqishëm në dhënien e ndihmës drejtuar të varfërve, njerëzve në nevojë, është edhe shoqata humanitare “Prishtina”, aktiviteti i së cilës shtrihet në të gjithë Ballkanin. Siç kuptojmë, muajt e fundit aktivitetet e shoqatës ishin të shumta dhe kanë ndihmuar fëmijët me pako ushqimore dhe veshmbathje, nga të ardhurat që u mblodhën nga një koncert i mbajtur në Ferizaj. Nga këto të ardhura, u mundësua rikthimi i buzëqeshjes për shumë fëmijë. Sigurisht, e gjithë kampanja arrihet edhe nga ndihmat që japin njerëz të vullnetit të mirë. Kjo shoqatë bamirëse ka shtrirë dorën për njerëz të kombësive dhe nacionaliteteve të ndryshme, duke mos bërë dallime dhe duke qenë pranë atyre që vërtet kanë nevojë për një dorë, për ndihmë dhe ngrohtësi. Pjesë kyçe kësaj shoqate është edhe këngëtari i mirënjohur Sulltan Hajolli, i cili është parë mjaftë aktiv në shpërndarjen e ndihmave. Përmes postimeve, këngëtari ka bërë të ditur se shoqata humanitare “Prishtina”, nuk do të bëjë dallime race e ngjyre dhe do të jetë pranë të gjithë atyre që kanë nevoj. Në postimet e fundit të Sulltan Hajollit është pasqyruar një pjesë e mirë e shpërndarjes së ndihmave në këto ditë të acarta dimri në Kosovë.