Kanë kaluar më shumë se dy vite nga bërja e koalicionit PDK-LDK. Por, janë poashtu dy vite të errësires, dy vite në të cilat Kosova nuk ka shënuar përparim në sfera të ndryshme. Vlenë të përmenden: zhvillimi i dobët ekonomik, papunësia e madhe, ngecja e njohjeve nga vendet tjera, korrupsioni, nepotizmi, e shumë gjëra tjera të dëmshme të cilat e kanë përcjellë dhe vazhdojnë të përcjellin këtë qeveri të krijuar nga dy parti politike të Kosovës, e që janë Partia Demokratike e Kosovës dhe Lidhja Demokratike e Kosovës. Që të dy këto parti në emërtimin e partive të tyre mbajnë fjalën ´Demokratike´, me pretendimin se janë parti demokratike. Ndërsa një parti mund të jetë demokratike, vetëm atëherë kur të respektohen parimet e demokracisë nga kryesia dhe anëtarët e saj. Këto dy vite të qeverisjes nga këto dy parti politike, janë përcjellur me shumë skandale, skandale të cilat e kanë dëmtuar rëndë imazhin e Republikës së Kosovës, që kanë shpier edhe në ngecjen e njohjeve të reja, por edhe në mos-krijimin e marrëdhenieve më të mira me shtetet të cilat hezitojnë të njohin Republikën e Kosovës. Janë nënshkuar me dhjetëra marrëveshje të dëmshme për Kosovën, e një nga marrëveshjet të cilat dëmtojnë rëndë sovranitetin e Kosovës, është marrëveshja mbi demarkacionin, e lëre më që liberalizimin e vizave, qytetarët e Kosovës nuk do të mund ta gëzojnë edhe pas qindra premtimeve të bëra nga dy liderët kryesor të këtyre dy partive politike. Nga Qeveria e tanishme, Diaspora nuk është duke e gëzuar asnjë të mirë edhe pse diaspora gjithnjë është angazhuar në ndërtimin dhe forcimin e shtetësisë së Kosovës, por edhe duke kontribuar në zhvillimin e saj ekonomik. Mungesa e planeve strategjike për involvimin e Diasporës në ndërtimin dhe zhvillimin e Kosovës, ka bërë që Diaspora të mos përfaqësohet denjësisht. Se sa do të zgjasë jetëgjatësia e kësaj qeverie, mbetët të shihet gjatë muajve në vijim. Zërat e shumtë brenda partive të koalicionit tregojnë se zgjedhjet e parakohshme mund të mos jenë larg.
Autor: Murat Makolli Kryetar i Degës së AAK-së në Hessen
