Të pathënat e festës së kurorëzimit tonë
“Më në fund ligjërisht burrë dhe grua ”, kjo është shprehja që kompleton një nga personazhet më të dashura ne ekranin e televizionit, Fiori Dardha. Po, ajo ende quhet Fiori Dardha sepse ka mbajtur mbiemrin e saj, ceremonia është bërë në përvjetorin e 50-të të lindjes së bashkëshortit dhe Abeli, djali i lindur si fryt dashurie i shikon i mahnitur në dritë të syve.
-Fiori, tashmë imazhin tënd të bukur dhe të dashur e shohim në MCNTV me “Xhadat”. Si ndodhi kjo lëvitje në ekran?
-MCN TV është një televizion i ri, shumë modern dhe që rritet çdo ditë duke bërë pjesë të tij figura shumë të dashura për publikun shqiptar. Mua më pëlqejnë sfidat dhe MCN ka potencialin e duhur për të realizuar një format investigativ dinjitoz. Drejtoj një staf me vajza e djem të mrekullueshëm dhe prej datës 21 mars, çdo mbrëmje në MCN TV sjellim emisionin satiriko-investigativ “Xhadat”. Si autore e këtij projekti ambicioz, nuk mund të jem më e lumtur se kaq!
-Bashkë me Rozin, jeni “xhadat” më të bukura të ekranit, sa me fat ndiheni për miqësinë e mirë por edhe për bashkëpunimin e frytshëm që keni në ekran?
-Atë që ju e shihni si fat, për mua është punë. Nuk mund të kesh asgjë të suksesshme për një kohë të gjatë bazuar tek fati. Për të bërë “Xhadat”, apo emisionet e ngjashme ku kam qene autore duhet shumë punë, përkushtim, profesionalizëm. Duke qene një emision i përditshëm, sado me fat të jesh, nuk ia del dot pa patur talent dhe pa punuar.
– Çfarë ke kuptuar nga bota mediatike në gjithë këto vite pune dhe nga gjithë këta ekrane ku je shfaqur?
-Në gjithë këto vite kam kuptuar se vetmja rrugë për të qenë e suksesshme është puna. Televizioni është kënaqësi dhe sakrificë.
-Kushtet më të mira të një X apo Y televizioni, a të ndihmojnë që të punosh më mirë, më me pasion?
-Sigurisht që kushtet e televizionit ndikojnë në realizimin e një programi. Për sa i përket pasionit, besoj që ai është i njëjtë në çdo rast.
-Mediat kanë shkruar dhe folur pafund për ty dhe për një histori të bukur dashurie, bashkëjetese, që u kurorëzua ligjërisht vetëm pak ditë më parë. fyt i së cilës është edhe një bukurosh me emrin Abel. Po unë, çfarë të shkruaj?!
– Ajo shprehja e vjetër që “mukajeti të lë pa martuar” ka funksionuar në rastin tonë. Ne në fillim bëmë fëmijën, pastaj bëmë dasmën e tani në fund u celebruam.
-Mbajte mbiemrin tënd, pse kjo zgjedhje?
-Për një arsye shumë të thjeshtë, sepse po të bëja ndryshimin e mbiemrit do të më duhej të bëja ndryshimin e të gjitha dokumentave. Unë nuk kam kohë të merrem me këtë gjë.
-Tani nuk do të lexojmë apo dëgjojmë më duke thënë “bashkësherri” apo do vazhdojë të jetë njësoj edhe pas dasmës ligjore?!
-Fakti që jemi zyrtarisht të martuar, nuk ka ndryshuar asgjë në marrëdhënien tonë në çift. Ne jemi për njëri – tjetrin ashtu siç kemi qenë deri tani.
-Festa e dasmës ligjore, po e quaj kështu, ishte me miqtë me të ngushtë dhe familjarët. Çfarë nuk do harrosh asnjëherë nga ajo mbrëmje?
-Habinë, emocionet dhe sytë plot shkëlqim të Abelit tonë 10 vjeçar, që ndiqnin plot kureshtje çdo veprim tonin. Jemi të lumtur që i dhuruam një kujtim kaq të bukur Abelit!
-Si të uroi Abel, cilat ishin fjalët e zemrës së tij për babin dhe mamin?
-“O maaa, o baaaa, po ju jeni martuar një herë. Ça ishte kjo?!”
-Fiori, mos ndoshta kemi ndonjë lajm akoma më të mirë në ardhje tani pas kurorëzimit të martesës?
-Po! Po punoj që në shtator, “XHADAT” të vijë me… (suprizë 😊)
-Një moment simpatik që i ka shpëtuar kamerave por që ti do të na e tregosh sot…
-Ne u celebruam në darkën e 50 vjetorit të bashkëshortit tim. Poooor, nuk u mjaftuam me kaq! Festa zgjati dy netë. Festuam me familjarë e miq të shtrenjtë dhe u kënaqëm pamasë. Më duket se do ta kthejmë në traditë që çdo 5 vjet, të gjejmë një sebep për të bërë një “dasmë” 😊
-Dhe, për ta mbyllur… Do ta mbyllësh ti e para, apo ta mbyll unë?
-Jam fanse e gazetës Intervista që kur isha adoleshente. Sot jam 42 vjeçe. Kaq mjafton për të kuptuar se sa shumë ju vlerësoj! 😊
Intervistoi: Fabjola Kuburi