– Doktor Dashamiri, ju përgëzoj për përgjigjet që jepni; jeni shumë i qartë. Unë kam një problem që nuk e di nëse është për fushën tuaj apo për ndonjë mjek tjetër, por gjithsesi, unë po e shkruaj. U bë ca kohë që kurohem për mungesë jodi dhe marr jodox, por prej dy muajsh kam rënie të mëdha flokësh dhe doktoresha më ka thënë që e kam nga tiroidet. Sa ndikojnë tiroidet te rënia e flokëve? Po te krizat nervore? E shoh veten shumë të nervozuar dhe shpeshherë, edhe të dëshpëruar, pa ndonjë shkak të veçantë. Ju lutem, më thoni çfarë shenjash jep zakonisht tiroidja e acaruar? Shpeshherë, ndjej skuqje të faqeve, saqë më djeg edhe lëkura. Veç të tjerash, kam rrahje të shpeshta të zemrës. Jam 29 vjeçe dhe jam beqare, pa fëmijë.
Dr. Dashamir Gjergji, Doktor i Shkencave Mjekësore, Endokrinolog-Diabetolog, Spitali Amavita, Rruga Pjetër Budi, 75/3, Tiranë:- Ju falënderoj për konsideratat ndaj meje dhe pyetjen tuaj interesante. Nëse jeni lexuese e rregullt e rubrikës mjekësore, besoj se do të keni patur mundësi të lexoni përgjigjet e mëparshme ku jo rrallëherë e kemi trajtuar fenomenin e rënies së flokëve në sëmundjet e tiroides. Tani po mundohem t’jua sqaroj pak më gjatë. Gjëndra tiroide është e domosdoshme për shumë funksione të trupit tonë dhe ka ndikim jo të paktë në lëkurë e anekset e saja, siç janë edhe flokët. Në kushte normale, hormonet e kësaj gjëndre, në bashkëpunim me faktorë të tjerë, marrin pjesë aktive në daljen, rritjen dhe mbajtjen e flokëve. Është e kuptueshme që, për një sëmundje apo një tjetër, niveli i hormoneve të tiroides ndryshon. Edhe kur shtohen këto nivele, por edhe kur pakësohen, do të kemi prishje të balancave në organizëm dhe, për pasojë, do të çrregullohen edhe efektet ushqyese e mbajtëse mbi flokët. Më thoni që ju kanë trajtuar për mungesë të jodit por nuk më keni dhënë asnjë element biologjik që e konfirmon këtë gjë. Në mjekësi, diagnoza e saktë është baza e gjithçkaje pasi mjekimi është pak më komod. Që të konfirmojmë defiçencën e jodit, duhet matur niveli i tij në gjak, urinë etj. Mjaft e rëndësishmë do kishte qenë edhe kryerja e ekografisë në këtë rast. E trajtova pak çështjen e diagnostikimit sepse nga mungesa e thjeshtë e jodit, nuk ka kaq shumë ankesa e aq më tepër, rënie të theksuara të flokëve. Në kushtet tuaja, jeni e lutur të mos merrni më asnjë lloj mjekimi pa u konsultuar me mjekun specialist endokrinolog.
– Vetëm duke vlerësuar gjendjen tuaj të përgjithshme dhe duke kryer ekzaminimet bazë funksionale dhe morfologjike të tiroides, do të shkonim drejt përcaktimit të saktë të diagnozës suaj. Te kjo diagnozë e kanë shpjegimin më vonë edhe një pjesë e shqetësimeve nervore që ju paraqisni më lart, duke nënkuptuar që nëse tiroidja ka prishur ekuilibrin e punës së saj, mbase edhe spektri i shqetësimeve psikologjike ka ardhur si rrjedhojë e mosfunksionimit korrekt të tiroides. Në rast të kundërt, nëse konfirmohet që gjendra juaj mund të jetë pak e zmadhuar, por me funksion normal, ne nuk mund t’ia ngarkojmë gjithë kuadrin tuaj klinik gjëndrës tiroide. Kur pyesni çfarë shenjash jep tiroidja e acaruar, kam përshtypjen që doni të dini si paraqiten klinikisht në ekstremitetin e vet, sëmundjet e tiroides. Sëmundjet e tiroides janë të ndryshme. Edhe krizat apo manifestimet e tyre ekstreme janë po aq të ndryshme. Rrahjet e shpejta të zemrës nuk mungojnë kurrë kur tiroidja e ka shtuar punën e saj dhe e kundërta, janë të ulura kur tiroidja ka ulur funksionin apo punën që kryen. Në fakt, defiçiti i jodit i sjell më vonë të dyja çrregullimet, edhe atë të tepricës së hormoneve të tiroides, por më shpesh çon në pakicë. Prandaj mos humbni më kohë lart e poshtë, por drejtojuni specialistit endokrinolog tek i cili ju besoni. Mbetëm në pritje të lajmeve të mira nga ju rreth shqetësimeve që jam i bindur se do marrin zgjidhje të shpejtë.
