Artela Brahimi, vjen në gazetën “Intervista” me një rrëfim të këndshëm për veten, muzikën, familjen, realizimin e saj në jetë, sa e përgatitur është për jetën publike. Ajo ka sjellë tre klipe në treg, ndër të cilët “Vajzat si melhemi” është ai që ka goditur më shumë zemrat e publikut.
Fabjola Kuburi:-Artela, për të gjithë ata që pyesin, kush është Artela dhe pse u bë pjesë e gazetës Intervista, çfarë do ti thuash?
Artela Brahimi:- Artela është një këngëtare e lindur dhe rritur në Shkodër që në fillim zgjodhi të plotësohej si femër, domethënë të qënurit nënë e pastaj të luftojë për realizimin e ëndrrës time në sirtar. Arsyeja për tu bërë pjesë e gazetës tuaj shumë e thjeshtë, mbështetja juaj pa dallime nivelesh artistike për individët me pak fjalë.
-Tre klipet e fundit, kanë patur sukses, çfarë ke bërë ti për të rritur suksesin e tyre?
-Kanë patur mjaftueshëm sukses.Unë nuk kam bërë asgjë veçse i kam lënë në dorën e dëgjuesve dhe i falënderoj për mbështetjen.
-Sa dorë ke ti dhe sa produksioni në përzgjedhjen e tematikës, në klip dhe në çdo përbërës të këngës tënde?
-Atëherë jam njeriu më i vështirë në studio dhe në xhirime marrë pjesë në tekste dhe i shkruaj, ka raste që një ide transformon një punë komplet.
-Ti vjen rrallë, por saktë me klipe. Mendon se është zgjedhja e duhur?
–Po, besoj se po, si përshembull klipi “Vajzat si mehlemi” që për mua është një ogur i mbarë në këtë fushë, ishte dedikim për vajzat e mia dhe që në momentin e parë që kam lexuar tekstin nuk e kam menduar dy herë, kam thënë kjo është e imja. Në dy klipet e tjera janë prekur tematika të jetës të përditshme.
-Çfarë do të na rrëfejë shpirti yt në këto momente?
-Shpirti im këto momente dhe gjithmonë është plot me dashuri nga nëna ime dhe fëmijët e mi një zinxhir dashurie dhe mbështetjeje që nuk këputet kurrë. Nënë-vajzë është dashuri e përjetshme.
-Ndodh shpesh ta kthesh kokën pas?
-Ndodh vetëm në aspektin që nuk harroj kurrë ngavij, domethënë vetëm për familjen dhe prejardhjen time, për asgjë tjetër nuk e kthej kokën pas!
-…gjatë këtyre momenteve, je e kënaqur me Artelën që është sot?
– Mjaftueshëm sepse çdo arritje të madhe apo të vogël e kam arritur me forcat e mia, nuk jam bërë urë mbikalimi askujt dhe as nuk i bëhem.
-Je e përgatitur për t’u përballur me çminin e famës, thashethemet, bërrylat e zilitë?
– Po, gjëra të vogla për mua.(Qesh)
-Kur të takohemi bashkë edhe pas disa vitesh, çfarë mendon se do ketë mbetur e pandryshuar te ti?
– Karakteri im, thjeshtësia nëse është shkruar të arrij diku, nuk harroj kurrë nga kam ardhur. Nuk të bën fama njeri, njeriu e bën famën .
-Pse të gjitha këngëtaret sot, më shumë sesa me zë, përpiqen të shesin muzikë me pamje?
-Nuk kam komente për këtë pjesë, secili ka zgjedhjet dhe mënyrat e veta të vijë në treg.
-Për shembull, pse duhet të shohim patjetër një vajzë seksi që këndon dhe jo një këngëtare që mund të mos jetë simpatike?
-Jo gjithmonë e bukura bëhet e paharruar, ndoshta shet për momentin por jo ndër vite, është parë që të paharruar kanë mbetur zëra të bukur jo femra të bukura, nëse je e tillë ky është një plus por nuk i përputhem këtij mendimi.
-Ti Artela, me çfarë shet?
-Nuk dua të vlerësohem kurrë si imazh por si vocal, prandaj ata që më njohin në live kanë vlerësuar këtë pjesë para pjesës së lartëpërmendur.
-Beson lehtë? Ka ndodhur që dikush ta ketë keqpërdorur besimin tënd?
– Jo nuk besoj aspak sepse kam besuar dhe është marr për dobësi, gjë që sot më ka bërë mos besoj në asgjë.
-Çfarë po përgatit për një të ardhme afatshkurtër?
– Po bëhem gati për disa pjesmarrje në televizionin e Kosovës dhe surprizat vijnë sëshpejti. Ju faleminderit ju për mbështetjen e artistëve dhe publikut.
