Si të kem bel më të hollë?

– Kam një pyetje përsa i përket hollimit të belit. Unë kam trup të rregullt në përgjithësi, por gjithsesi belin e kam pak të gjerë dhe kam tendencën të vë dhjamë në atë pjesë të trupit. Do të doja ta kisha më të hollë. Çfarë ushtrimesh më këshilloni?
Mario, instruktor: – Si gjithë pjesët e tjera të trupit, edhe beli ka ushtrimet e tij dhe sigurisht, siç thoni edhe ju, i duhet kushtuar shumë vëmendje. Unë, së pari, do ju sugjeroja që në momentin që bëni kardio, pra, vrap, biçikletë apo step, të mbani një brez sportiv për belin. Kjo jo vetëm do t’ju ndihmojë të shkrini më shumë dhjamin në këtë pjesë të trupit, por edhe ju ruan nga dhimbjet e mesit. Ama, kini parasysh të keni një bel të hollë normal, jo të bëheni me fiksime e të tejkaloni limitin, siç bëjnë shumë femra që arrijnë dhe gjer te ndërhyrjet kirurgjikale dhe për pasojë, i shkaktojnë vetes probleme shëndetësore të pariparueshme. Beli duhet të jetë në proporcion me pjesën tjetër të fizikut. Pra, siç po ju thoja, mbajtja e brezit do t’i japë formë më të mirë belit tuaj.
– Ndërsa përsa u përket ushtrimeve, duhet të ushtroheni së pari me gira për anësoret. Besoj se e dini procedurën, duke mbajtur njërën girë në njërën dorë dhe tjetrën, pas koke. Siç jeni në pozicionin në këmbë, përkuluni në anësore nga ana e girës; bëjeni këtë për secilën anë.
– Ushtrim tjetër: Duke e mbajtur shpinën tuaj drejt, uluni në dysheme dhe ngrijini gjunjët tuaj lart, duke i prekur nyjet e këmbëve me njëra-tjetrën. Vendosni duart tuaja prapa në dysheme për të mbajtur balancën. Kontraktoni muskujt e barkut dhe ulni këmbët në anën e majtë derisa ato të jenë rreth 6 cm nga dyshemeja, duke i mbajtur nyjet e këmbëve të bashkuara dhe supet tuaja përpara. Këmbët duhet të rrokullisen, por duhet të qëndrojnë në dysheme. Mbani për një sekondë dhe më pas ngrini këmbët tuaj e kaloni në anën e djathtë. Përsëriteni këtë në çdo anë për një minutë! Ky është një ushtrim efikas jo vetëm belin, por edhe për barkun.
– Pozicion tjetër është shtrirja në anësore. Qëndroni në anën tuaj të djathtë me këmbë të shtrira. Vendoseni parakrahun tuaj drejt përpara belit tuaj dhe ngrijeni dorën e djathtë në anën e majtë. Vendosni dorën e majtë prapa kokës, në mënyrë që bërryli të jetë në drejtim të tavanit. Më pas, duke qëndruar në këtë pozicion, ngrijeni këmbën e djathtë lart, duke bërë një hapje të këmbëve prej gjysmë metre. Mbajeni për dy sekonda dhe më pas, ngadalë, kthehuni në pozicionin fillestar. Filloni me 5 deri në 8 lëvizje të këmbës në çdo anë dhe pas dy seteve, pushoni 1 minutë.