Kjo ëmbëlsirë ka origjinë belge, por është mjaft e përhapur edhe në Francë.
Përbërësit
Për marengën:
120 gramë të bardha vezësh (4 vezë)
240 gramë sheqer pluhur
Për zbukurimin
çokollatë me qumësht 150 gramë
1-2 biskota të thërrmuara
Për kremin shantiji
360 ml pana e lëngshme, shumë e ftohtë
60 g maskarpone
40 gramë sheqer pluhur
Vanilje
Përgatitja
Marenga: Ngrohni furrën në 110 gradë celsius. Rrihini mirë të bardhat derisa të formohet një shkumë e fortë dhe pastaj shtoni dalëngadalë sheqerin pluhur. Hidheni marengën në një shiringë pastiçerie dhe bëni dy rrathë me një diametër 20 cm, duke e vënë marengën në formë spirali, derisa të formohet rrethi. Vërini në furrë për 50-55 minuta. Marenga duhet të forcohet, por të mbetet e bardhë. Lëreni të ftohet.
Kremi shantiji: Vini një tas metalik dhe rrahësen e vezëve në ngrirje për 10 minuta. Hidhni në të kremin e maskarponen dhe filloni t’i rrihni ngadalë. Shtoni pak nga pak shpejtësinë. Sapo kremi fillon të fryhet dhe të ngjitet pas rrahëses, shtoni sheqerin pluhur dhe vazhdoni rrahjen derisa shantijija të fryhet (dhe kur ta kthejmë tasin, të mos derdhet).
Formimi i tortës: Në një pjatë torte vini një rreth me marengë, hidhni sipër krem shantiji, vini rrethin e dytë dhe mbi të, përsëri shantiji, duke i dhënë formën e një kubeje. Grini çokollatë dhe 1-2 biskota për të zbukuruar tortën.
