– Jam lexuese e rregullt e kësaj rubrike dhe dua të di efektin që japin peshat në stërvitje. Unë nuk i përdor, por me aq sa më thonë, thuhet që janë të dobishme. Unë i kam bezdi, me thënë të drejtën dhe bëj vetëm kardio, me peshat nuk merrem fare.
Mario instruktor: – E nderuar lexuese, një stërvitje pa pesha, quhet gjysëm ushtrim, për të mos thënë që pas njëfare kohe, nuk do të shikoni rezultate aspak të mira në trupin tuaj. Ju bëni vetëm kardio, por pas njëfarë kohe do të keni nevojë edhe për peshat, sepse bini në peshë dhe vetëm të ushtruarit me pesha do t’ju ndihmojë që ta tonifikoni trupin tuaj. Stërvitja me pesha e vendos trupin nën trysni. Për të përballuar peshën e ushtrimit, trupi intensifikon përpjekjet dhe kjo bën që të rritet niveli i forcës. Me kalimin e kohës rritet intensiteti i të ushtruarit me pesha, gjithmonë në varësi të moshës dhe peshës suaj. Të ushtruarit me pesha ka si qëllim në vetvete rritjen e forcës dhe të rezistencës e tonifikimin e trupit.
– Në qoftë se ju kërkoni të keni vetëm rezistencë, atëherë stërvitja bëhet me shtanga, gira ose edhe me pajisje të forcës, të cilat lejojnë kontrollin e sasisë së peshave dhe pozicionit të trupit. Ushtrimi mund të jetë me ngritje, shtytje ose tërheqje. Që t’i rezistoni peshës gjatë ushtrimit, duhet të rrisni sasinë e peshës duke ngritur pesha më të rënda, ose mund të rrisni numrin e serive gjithnjë me pushime në mes, duke ndryshuar numrin e përsëritjeve. Po kështu, mund të rrisni kohëzgjatjen e ushtrimit, duke ulur shpejtësinë e kryerjes së tij.
– Programet me pesha mund të bëhen duke përdorur pajisjet që keni në palestrën ku ju shkoni, girat e dorës dhe shtangat. Stërvitja me pesha me anë të pajisjeve që keni aty, rrit sigurinë. Stërvitja me gira në pamje të parë duken të lehta, por ato kërkojnë më shumë njohuri dhe teknikë sepse është më i lartë rreziku i dëmtimit të muskujve. Pra, janë për nivel më të avancuar. Megjithatë, pavarësisht llojit që përdor, rregullat e përsëritjes së seteve janë të njëjta.
– Stërvitja me pesha rrit performancen dhe përmirëson qëndrimin e trupit sepse tonifikohen muskujt. Te femrat ndikon shumë në parandalimin e osteoporozës, artritit dhe depresionit, duke qenë se këto të fundit janë më të prekshme sesa meshkujt nga këto lloj sëmundjesh. Ndihmojnë gjithashtu në parandalimin e sëmundjeve të zemrës, diabetit apo obezitetit. Mbi të gjitha, ju tonifikohet trupi dhe nuk ju varet mishi, siç u ndodh shumë femrave të cilat bëjnë vetëm kardio dhe nuk ushtrohen fare me pesha.
– Duke mos marrë parasysh fare moshën, kushtet, qëllimet, përfitimet nga të ushtruarit me pesha janë të menjëhershme. Endorfina që çlirohet gjatë stërvitjes me pesha sjell menjëherë përmirësimin e humorit dhe rrit vetëbesimin. Dhe, sipas statistikave të fundit, simptomat klinike të depresionit zvogëlohen pas 10 javë trajnimi me pesha, kurse dendësia e kockave mund të rritet me 14 % në 5 muaj. Dhimbjet e artritit dhe dhimbjet e mesit qetësohen shumë nga stërvitja me peshën e duhur, por kini gjithmonë parasysh që duhet të konsultoheni me instruktorin për mënyrën e përdorimit, sepse një teknikë e gabuar sjell dëmtime fizike.