Një grua
Njoha një grua, ish’ e martuar
Me flokë të verdhë e sy jeshilë
Harrova që isha i unazuar
Por jo të isha, me të xhentil
Në një sedilje të një makine
Na toku rasti një ditë Maji
Një përshëndetje disa shikime
Tek unë u ndez padashur faji
Qeshëm, bëmë goxha muhabet
Me gruan e tjetrit zura miqësi
Aty në sedilje u shkrua një jetë
Batuta humori me shumë çiltërsi
E dija që zemrën s’ia vidhja dot
E dinte që hapin unë s’e hidhja
Ndaj ne flasim sërish edhe sot
Tjetër rrugë s’mund të zgjidhja
Njoha një grua ish’ e bukur
Por shpirtin më të bukur kish
Me sy në zemër më pati ndukur
Mollë e ndaluar dashurish… Romeo Gegushi
Të dua, moj mike, të dua…
Të dua, moj mike, të dua,
Nga maja e flokut, në thua.
Jam marrëzisht i dashuruar,
Me të gjitha nazet e tua…
Më thuaj mike, më thuaj,
Përse je kaq e djallëzuar?
I mjeri unë, më ke tërbuar,
Kur të shoh duke kaluar…
Ah, sikur pak të më doje,
Një rreze dielli të më lëshoje,
Jetën do ma zbukuroje,
Një mijë vjet do ma zgjatoje.
Mike, më dëgjo, një herë,
Më thuaj se po vdes i mjerë,
O më mbaj, o më bëj lanet,
Se si qiriu po më tret…
Mike, të lutem, më prano,
Largësinë ti ma shkurto,
Më jep krahë në dashuri,
Të fluturojmë në qiell të dy!… Luljeta Gjosha Pashollari
Kujtime të fshehur
Shumë gjëra thërrmohen e s’bëjnë thërrime
Ka zemra që grihen çdo ditë e nga pak
Si shkumës do t’fshihen me qindra kujtime
Por ka edhe kujtime që mbeten në gjak!
Ka gjëra që humbin diku brenda teje
Dhe bëhen ”sëmundje” kronike pastaj
Vërtiten me gjakun e fshehur ndër deje
Plagë e bejnë zemrën që s’mundet të qajë.
Ka grimca kujtimesh që kurrë nuk harrohen
Që kohën dhe ditët, dinë mirë t’i gënjejnë
Në mish e në kocka vullnetshëm strehohen
Plagë e bëjnë zemrën e shpirtin rrëmbejnë! Bledi Ylli