Një anije kozmike robot do të kapë një shkëmb të madh nga një asteroid dhe do ta vërë të rrotullohet rreth Hënës, duke e bërë këtë të fundit me satelit. Ky është plani që po mendon NASA, për të studiuar shkëmbin, për sa kohë ai rrotullohet rreth Hënës.
Misioni Asteroid Redirect Mission (ARM) do t’i japë mundësi NASA-s të mësojë më shumë mbi teknologjitë që do të përdoren për të çuar njerëz në Mars. “Zgjedhja për të marrë një copë shkëmbi nga një asteroid do të ketë ndikim direkt në planifikimin e misioneve të ardhshme me njerëz në hapësirë dhe në fillimin e një epoke të re të udhëtimeve në hapësirë”, ka deklaruar zëdhënësi i NASA-s, Robert Lajtfut. Gjithashtu, teknologjia që do të përdoret, do ta ndihmojë NASA-n ta mbrojë planetin tonë nga veprimi i asteroideve. Gjatë misionit, shërbimi amerikan do të provojë teknikat që mund të përdorë për largimin e një asteroidi, kur ai i është drejtuar Tokës.
NASA e ka quajtur projektin e një anijeje robot si “zgjedhja B” dhe ka përgatitur edhe një plan tjetër për të ndryshuar drejtimin e një asteroidi. Nëse “zgjedhja B” do të ketë sukses, anija robot do të ulet në një asteroid mjaft të madh që do të mund ta mbajë atë dhe në vazhdim do të vërë në orbitë njërin nga shkëmbinjë e tij rrotull Hënës. Sipas NASA-s, asteroidi do të zgjidhet jo më herët se 2019-a dhe më pas do të ndërtohet një anije kozmike që do të çojë atje robotin pas një viti. Deri më tani, ajo ka zgjedhur tre asteroidë kandidatë dhe para se të bëjë zgjedhjen përfundimtare, shpreson të gjejë edhe një ose dy të tjerë, të cilët do të studiohen për madhësinë e tyre, formën, orbitën, por edhe karakteristika të tjera. Kur të zgjidhet asteroidi, anija do të ulet në të dhe krahët e saj do të kapin shkëmbin dhe do ta çojnë në orbitë pas disa vjetësh.