I ka fituar vërtet këto para nipi im?

– Kam një nip me banim në Durrës. Para disa muajsh, ndërsa punonte në internet, i doli një informacion ku i thonin se, duke qenë i milionti i frekuentuesve të internetit, ishte fitues i një çmimi dhe do të merrte një shumë parash në bankë. “Siguroni një dokument identifikimi për të marrë sasinë si fitues”, thoshte shënimi. Nipi dha emrin, mbiemrin e adresën e tij, por askush nuk e ka kontaktuar. Dua të di nëse i ka fituar vërtet këto para nipi im… Jam në pritje të përgjigjes suaj. Nailja.
– E nderuar Naile, së pari na vjen keq që edhe nipi juaj ka rënë pre e këtyre mashtrimeve on line. Ajo që i ka ndodhur nipit tuaj, u ndodh shumë njerëzve që kanë një adresë në internet. Ato që shkruajnë gjëra të tilla, që deklarojnë se keni fituar çmime etj. janë mashtrues. Këta piratë interneti e bëjnë këtë gjë që të fitojnë ata dhe nëse u jepet mundësia, të vjedhin kursimet e tjetrit po nëpërmjet internetit. Ata vërtet kërkojnë adresën e shtëpisë dhe mundësisht, edhe numrin e llogarisë së kursimit, por e bëjnë këtë në mënyrë që t’ju marrin paratë që keni në to. Kështu, më vjen sërish keq që ju ka ngjallur shpresa një njoftim i tillë, por porositeni nipin tuaj të mos u besojë më këtyre mesazheve që i vijnë nga interneti dhe të mos kontaktojë me këta njerëz, aq më pak t’u japër të dhëna për veten. Gjithë të mirat!