Studentja Marlen Tilek që po specializohet për parazitologji në Universitetin Mjekësor të Sharitit në Berlin, kishte shkuar në ishullin e Madagaskarit për të studiuar mënyrat e profilaksisë dhe kurimit të sëmundjes tungiaz, e cila që prej disa shekujsh po bën kërdinë mes banorëve vendas. Kjo sëmundje shkaktohet nga pleshti Tunga penetrans. Ai u hyn këmbëzbathurve nën lëkurën e tabanit të këmbëve dhe shkakton këtë sëmundje. Femrat e Tunga penetrans, penetrojnë nën lëkurën e qenieve të gjalla me gjak të nxehtë deri në 10 milimetra dhe lëshojnë atje vezët e tyre. Pas kësaj, ngordhin, por vendi i “kafshuar” inflamohet dhe bëhet vatër e infeksioneve të tjera. Mënyra e vetme për shërimin është pastrimi i trupit nga parazitet dhe vezët e tyre…
Për dreq, një parazit i tillë i hyn nën lëkurën e këmbës edhe stazhieres Marlen Tilek, por ajo, me të kuptuar se këmba e saj ishte bërë “strehë pleshtash” jo vetëm që nuk mori asnjë masë për të shpëtuar prej tyre, por bëri çmos t’i mbante ata në trupin e vet dhe të ndiqte zhvillimin e tyre, duke fotografuar dhe xhiruar në kamera çdo sjellje. Për ta mbajtur pleshtin të izoluar nga shoqet dhe shokët e vet, ajo mbante çorape dhe këpucë të shtrënguara pas këmbës. Në ditët e para, pleshti jetonte nën lëkurën e këmbës së saj normalisht, por pastaj, në vend që të vazhdonte procesi i filluar dhe të nxirrte vezët, pleshti u qetësua dhe heshti. Si përfundim, studentja e mbajti pleshtin nën lëkurën e këmbës së saj afro dy muaj, pastaj filloi të ndjente shqetësime dhe u detyrua ta nxirrte jashtë. Pasi u kthye në Berlin, Tileku dhe udhëheqësi i saj shkencor nxorën konkluzionet: Përse pleshti nuk lëshoi vezë? Doli se ajo ende nuk ishte mbarsur. Të gjithë përvojën e saj si mbajtëse në trup të Tunga penetrans, Tileku e botoi në formën e një raporti shkencor në numrin e nëntorit të revistës “Travel Medicine and Infectious Disease”… Tanimë, atë insekt nuk e njeh askush aq mirë sa ajo që e mbajti për dy muaj të tërë në trupin e saj.
