A është psikologjike humbja e kujtesës?

– Ju lutem, më thoni, a është normale që në moshën 60 vjeçare të të dobësohet kujtesa? Vë re që here pas here kam humbje të kujtesës, i harroj gjërat. Mos vallë është psikologjike, apo është fizike? Çfarë thonë psikologët apo mjekët?
– I nderuar zotëri, kur vjen njëfarë moshe, është më se normale të fillojnë disa ndryshime biologjike që janë karakteristikë e shëndetit mendor. Për këtë, mjekët tanë kanë folur shpesh. Te disa persona bie mprehtësia e pamjes, te disa të tjerë bie mprehtësia e dëgjimit, e perceptimit, e të folurit, të cilat në njëfarë mënyre mund të vështirësojnë bashkëveprimin shoqëror. Gjithashtu, ndryshimet në njohuri dhe në psikologji, çrregullojnë veprimtarinë jetësore të të moshuarve, ndërsa kujtesa, pra, humbja e saj, nuk është element i pleqërisë, por i sëmundjeve të saj. Demenca përcaktohet si një përkeqësim i aftësive intelektuale, që shpesh është i një graviteti të mjaftueshëm për të ndërhyrë në funksionimin shoqëror dhe profesional. Defiçiti përfshin shumicën e aspekteve të njohjes, kujtesën primare dhe gjykimin. Funksionet më të larta kortikale, të tilla si: Gjuha, arsyetimi abstrakt dhe aftësia për të zbatuar porositë, në përgjithësi janë po ashtu, të dëmtuara. Ndonëse demenca është më e zakonshme në popullatën e moshuar, ajo nuk është sinonim i moshës së vjetër. Gjithashtu, nuk është pjesë normale e procesit të plakjes. Sëmundjet që shkaktojnë demencë (pra, humbjen e kujtesës) janë traumat e kokës, sëmundja e pleqërisë etj. Gjithsesi, duke qenë se ju nuk keni probleme të tjera fizike dhe jo ndonjë humbje të madhe kujtese, nuk duhet të shqetësoheni kaq shumë sepse ndonjëherë, ky lloj fiksimi bëhet psikologjik dhe juve ju duket sikur vërtet po përkeqësoheni. Kurimi i këtij lloj çrregullimi të kujtesës, sidomos në këtë moshë, aktualisht, është i pamundur. Shkencëtarët po punojnë shumë për zbulimin e kësaj patologjie dhe shërimin e saj.