Nëse jeni duke lundruar me pultin tuaj nëpër kanale televizive, sigurisht që nuk do t’ju shpëtojë pa parë klipi që vjen nga Leonora Poloska, titulluar “Me neve”, ku baladat tanimë i lënë vendin muzikës rrep. Një bashkëpunim me B- boy, e sjell këngëtaren në një eksperimentim të ri muzikor, që i shkon mjaft për shtat. A ka vendosur ajo të rikthehet fuqishëm në muzikë? A ka projekte të reja që e presin? A po jeton një histori dashurie? Le ta lëmë më mirë Leonorën të përgjigjet…
Arjana Bregu: – Leonora, u bënë të lodhshme baladat që këtë herë kemi një këngë rrep?
Leonora Poloska: – (Buzëqesh) Jo, kurrsesi. Unë në balada e gjej veten, mirëpo më pëlqen të jem universale sa i përket muzikës.
– Pjesa e rrepit është shumë interesante dhe duket se ti e bën mjaft mirë. Mendon se të shkon më shumë roli i vajzës së mirë, apo asaj të keqe?
– Si mendoni ju? (Buzëqesh)
– Mund të kishe zgjedhur çdo reper tjetër për këngën… Pse pikërisht B-boy?
– Sepse është një djalë muzikal dhe u përshtatëm mjaft mirë në këtë bashkëpunim.
– Do të bëje një klip ku të merrje edhe të dashurin me vete?
– Asnjëherë, të dashurin e mbaj veç për vete! (Buzëqesh)
– Fakti që ke munguar gjatë në muzikë, të ka frymëzuar mjaftueshëm për të vazhduar intensivisht në këtë fushë?
– Definitivisht, mund të thuhet se po.
– A ka Leonora kundërshtarë në muzikë?
– Është e natyrshme. Çdo gjë, sipas Ajnshtajnit, është relative. (Qesh)
– Cila është për ty kënga më e mirë e të gjitha kohërave?
– “Let it be”.
– Po aktivizohesh me koncerte apo mbrëmje muzikore aktualisht?
– Këto janë synimi dhe axhenda ime për momentin.
– Cili ka qenë suksesi yt më i madh në jetë?
– Jam duke e pritur. (Buzëqesh)
– Jashtë muzikës, çfarë ta bën të bukur ditën?
– Dielli.
– Ke dashur ndonjëherë të biesh në peshë apo ta kesh munduar veten me dieta të rrepta?
– Dieta të rrepta jo, por vetëm ushtrime dhe ushqim të shëndetshëm, të ekuilibruar.
– Çfarë rregulli ke zakonisht kur nis të zgjedhësh dhuratën për dikë?
– Jam spontane.
– Kohëve të fundit, është kthyer gati në trend shtatzania…
– Për momentin, fokusin e kam në gjëra të tjera.
– Cilat janë idetë e tua për një shtëpi të ngrohtë?
– Harmonia.
– Cila është fusha ku do të doje të hidheshe në veprim tani?
– Në atë të kreativitetit, të krijimit të diçkaje me vlerë.
– Të pëlqen të bësh plane afatshkurtra apo afatgjata?
– Varet për çfarë bëhet fjalë…
– Ndodh të të prishen planet në minutën e fundit?
– Shumë herë. (Qesh)
– Një ndryshim që e ke vënë re te vetja me kalimin e kohës?
– Përveç ngjyrës së flokëve? (Qesh)
– Si është Leonora jashtë skenës? Ka gjëra që nuk i shfaq në skenë?
– Bëj lakror, laj, pastroj…
– Nëse ndodhesh në shtëpi, e shfrytëzon kohën për të gatuar diçka, për të parë një film apo për të fjetur?
– Të gjitha këto, sipas mënyrës që i ke renditur. (Qesh)
– Çfarë mendon se është tipike e femrave sot?
– Gjithçka, përveç mustaqeve dhe mjekrës. (Buzëqesh)
– Mendimi yt për komunitetin LGBT në Shqipëri?
– No comment.
– Çfarë do t’i thoje një shoqeje që sapo është ndarë nga i dashuri?
– Do të isha reale dhe nuk do t’i mbaja anën nëse do të ishte me faj.
– Për çfarë do t’i jepje fund një lidhjeje të rëndësishme?
– Vetë ideja fund, nuk lë vend për shpjegim.
– Çfarë është e rëndësishme për harmoninë e një çifti?
– Kompromisi.
– A e ke një lidhje të bukur aktualisht?
– Nuk di a ekziston një lidhje e bukur. (Buzëqesh)
– Sa rëndësi i jep fatit në jetën tënde?
– Aspak. Unë gjërat që kam dashur, i kam realizuar me punë.
– Po pamja, në çfarë mase ka ndikuar?
– E kujt? (Qesh)
– Jotja e kujt tjeter? Ke ndonjë defekt ti?
– Ndoshta s’e kam vërejt. (Qesh)
– Cila është një cilësi e jotja?
– Kokëfortësia.
– Për çfarë do të grindeshe me dikë?
– Për zi ose bardhë. (Qesh)
– Cilat janë vlerat më të shtrenjta për ty?
– Karakteri, mbi të gjitha. Prej tij, derivojnë të tjerat…
– Interesohesh për politikën?
– Do, s’do, vetë ajri ta imponon.
– Pushimet i bere në Shqipëri apo jashtë saj? Vendi i preferuar?
– S’ka pushim, vetëm punë! Vendi i preferuar, Honolulu.
– Projekte të reja në muzikë?
– Yes! (Buzëqesh) Të reja, ju presin.