– Përshëndetje përfaqësuesve të INAS-it! Quhem Albina dhe jam e interesuar të di diçka paraprakisht në lidhje me studimet në Itali. Unë jam diplomuar gjatë verës së këtij viti dhe po mendoj të ndjek studimet në shtetin fqinj, por nuk e di a jam në kohën e duhur për të aplikuar. Në qoftë se jo, kur mund të filloj me procedurat për vitin tjetër?
Beskida ALIAJ, Koordinatore “INAS – ALBANIA”: – E dashur Albina, më duhet t’ju them që për këtë vit nuk jeni më në kohën e duhur, pasi procedurat e aplikimeve për studimet në Itali kanë përfunduar më 1 gusht të këtij viti dhe juve ju ngelet të aplikoni për vitin tjetër. Gjithsesi, ju kujtoj që një ndër kriteret për marrjen e vizës në ambasadën italiane është edhe mbrojtja e gjuhës italiane pranë Institutit Italian të Kulturës me Certifikatën CELI 3. Datat e provimeve të Certifikatës Celi janë me 24 nëntor 2014 dhe 7 mars 2015. Datat e regjistrimit për një kurs parapërgatitor për provimin pranë Institutit Italian të Kulturës janë nga data 1 gjer më 20 shtator 2014 dhe nga data 2-24 janar 2015.
– Për regjistrim, nevojitet: 1. Shuma totale e pagesës në dorë. 2. Fotokopje e një dokumenti identifikimi (pasaportë, kartë identiteti, patentë). 3. Dy fotografi. Në momentin e regjistrimit, për të hyrë në kurs, studenti duhet të bëjë një test orientues me një çmim prej 500 lekësh. Në momentin që fillojnë procedurat për studime në Itali, në ditët e fundit të marsit, ne ju mirëpresim në zyren tonë për t’ju ofruar ndihmë dhe asistencën e nevojshme për të gjithë rrugëtimin që duhet ndjekur, deri në fund të tij.