E dini çfarë ka ndodhur me Françeska Jaçen? Sigurisht, asgjë e keqe, përkundrazi! Nuk është as një nga ato lajme që të bëjnë të dalësh në kryetitujt e gazetave, ama është një nga ato gjëra që më së shumti i vlerësojmë në jetën e përditshme: Kjo vajzë, është me këmbë në tokë! Para tre vjetësh, ndërsa dilte nga Big Brother, Françeska ishte nga ato vajza që fama i ka marrë përpara; e bukur, elegante, një vajzë që binte në sy; çfarë mund të donte më shumë një 18 vjeçare nga jeta? Sot, ajo është një studente që veç të tjerash punon, duke marrë në dorë jetën e saj dhe, nëse duke parë fotot e saj mendoni se keni të bëni me një vajzë që është thjesht e bukur, ju siguroj që jo; ajo është më shumë se kaq. Dhe, si mund të mos jetë e këndshme një intervistë me një vajzë si ajo? Do të më jepni të drejtë kur ta lexoni!
Bukuria dhe ti…
– Françeska, a mund të jetë një vajzë e bukur, edhe e zgjuar?
– Po, unë besoj se një vajzë mund të jetë e bukur dhe e zgjuar. Bukuria është një fenomen që çdokush e vërteton në impaktin e parë, ndërsa zgjuarsia vërtetohet pas atij impakti, ndërsa bisedon…
– Ti, si ua vërteton këtë teori atyre që të rrethojnë?
– Si ua vërtetoj?! Thjesht, mundohem të jem unë që jam e t’i përcjell gjërat ashtu siç i perceptoj, të jem sa më e thjeshtë.
– Si e trajton veten një vajzë që bie në sy kudo që kalon?
– Ajo që ka tru në kokë, mundohet të jetë sa më e thjeshtë dhe jo mendjemadhe.
– Si reagon ti ndaj vështrimeve të njerëzve?
– Me thënë të drejtën, mua, vështrimet e njerëzve më falin sadisfaksion dhe mundohem t’u buzëqesh.
– Më thuaj ngacmimin më pavend që të kanë bërë, ku dhe si ndodhi?
– Epo, zakonisht, këto janë ngacmime brutale që ndodhin në rrugë apo kur je duke ngrënë, që është gjëja më e bezdisshme!
– Veç bukurisë, ç’tipar tjetër i njeh vetes?
– Jam e thjeshtë në shoqëri dhe shumë e qeshur. Këtë ma vënë re të gjithë.
– Sa kohë i duhet një vajze të bukur për të dalë nga shtëpia?
– Një vajzë të bukur i duhet më pak kohë… (Buzëqesh) Mjaftojnë 20 minuta, pasi ajo është e bukur vetë dhe për mua, bukuria qëndron te natyraliteti.
– Cila është gjëja më e çuditshme që ne nuk e dimë për ty?
– Hëm, gjëja më e çuditshme… Harroj shumë e për çdo gjë, por mundohem ta fsheh dhe të mos bie në sy…
Françeska dhe e përditshmja…
– Kur dole nga Big Brother, ti ishe ende shumë e re dhe me synime për të vazhduar studimet… Ndërkohë, për ty nuk kemi dëgjuar të flitet më në këtë drejtim. Na trego, si po shkon jeta jote tani?
– Kur dola nga Big Brother isha veçse 18 vjeçe dhe normalisht, s’e njihja shumë realitetin në botën e televizionit. Tashmë kanë kaluar 3 vjet dhe kam vendosur t’u dedikohem atyre që realisht kanë rëndësi në jetë dhe janë fitimprurëse; shkollës dhe punës. Aktualisht, po studioj në Universitetin Mesdhetar të Tiranës.
– Çfarë synon aktualisht?
– E shikoj veten një diplomate të ardhshme…
– Veç modës, me çfarë po merresh?
– Punoj si menaxhere në një lokal nate.
– Herë pas here, bëhesh e gjallë me foto cool… Është taktikë për të mos u harruar, mes kaq shumë bukurosheve që synojnë famën?
– Jo, nuk është taktikë për të mos u harruar sepse unë nuk kam për t’u harruar!
– Ti, e synon famën?
– E synoja më parë, kurse tani që e kam realisht, nuk më bën përshtypje, sepse fama nuk është ajo që të jep lumturinë dhe as nuk të bën të pasur këtu në Shqipëri. Jashtë shtetit, po.
– Çfarë do t’u thoje gojëve të liga që thonë se je një nga ato personazhe që janë destinuar të humbasin?
– Unë humb kur dua dhe fitoj po prapë kur dua. Unë kam më tepër se ata që mendojnë se kanë fituar…
– A është babi, po aq “përkëdhelës” ndaj vajzës së tij, sa e kemi njohur në Big Brother?
– Po, normalisht, është po i njëjti, për të mos thënë edhe më tepër…
– Çfarë të ka këshilluar ai së fundmi?
– Së fundmi? Kanë qenë çështje ekonomike… “Kurseeee, Françeska!”. (Buzëqesh)
Funny Franceska
– Nëse do të të jepja një elefant, ku do ta fshihje?
– Poshtë krevatit! (Qesh)
– Nëse do të kishe qenë ëmbëlsirë, si do ta kishe emrin?
– Trileçe!
– Cila është ngjyra jote e preferuar e getave?
– Nuk i vesh fare, bile i urrej!
– Të ndodh të ushqehesh ndonjëherë në krevat, ose në ndonjë vend më të çuditshëm se ky?
– Eh, në fakt, unë në shumicën e rasteve, ushqehem në krevat!
– Nëse do të kishe mundësi të zgjidhje një aktor të famshëm për ta patur përkrah, ai do të ishte…
– Bred Pit, kush tjetër?!…
– Po të vuaje nga somnambulizmi, ku do të doje ta gjeje veten në mëngjes?
– Ooooo, në Bora-Bora!
– Të ndodh të flasësh ndonjëherë me kafshët? Çfarë u thua?
– Flas përherë e për çdo gjë sepse unë kam një qenushe të cilën e trajtoj si njeri; i them gjithçka!
– Çfarë do të kishte thënë krevati për ty, po të kishte gojë të fliste?
– …Çohuuuu, se le nam! Fli njëherë natën si njeri e jo ditën!
– Di gjë, pse t’i bëra ty gjithë këto pyetje?
– Sepse më ke xhan?!
