I nderuar Zoti Edi Rama!
Po ju bëj një thirrje jo si gazetar dhe ekonomist, po si një taksapagues i këtij vendi me të drejtën që më jep ai 15 përqindshi që ju me merrni në burim për çdo të ardhur dhe 20 përqindshi që më merrni me TVSH si dhe më shumë taksa e akciza. Po të shkruaj se më vret në shpirt fakti që paratë e mia gjenden në sirtarë mbathjesh firmato të punonjëseve të tua dhe nëpër tuba sobash e poshtë dysheqeve që qelbin erë imoralitet. Te lutem, lëri lojërat me video e me shkarravina për punët që po bën në krye të qeverisë. Hallet e Shqipërisë tani nuk janë as stadiumet e as amnistia fiskale. Halli i vetëm i këtij vendi është korrupsioni që po na gërryen. Te lutem lër çdo gje dhe merru vetem me të. Dil para shqiptarëve dhe thuaj të vërtetën, tregoja sëmundjen, udhëhiqi në këtë luftë dhe do t’i kesh mbrapa pa qenë nevoja për ERTV, video dhe marifete reklame. Dil se do mbetesh në histori. Nuk është e vështirë t’a bësh, mjafton të duash.Mendoj që aftësi ke! Veç kësaj vetëm dy milionë e gjysmë kemi mbetur. Jemi shumë kollaj për t’u qeverisur. Nëse nuk e bën dot, ik se nuk kemi nevojë për asgjë tjetër nga ty. Ik edhe nëse e bën dot, por nuk të lënë. Lërja vendin dikujt që e bën këtë. Çdo njeri që i dhemb atdheu, që ka pak kulturë dhe shkollë e bën shumë kollaj këtë gjë. Le të mbetet ai ose ajo në histori. Artan Kristo
Thirrje kryeministrit tim! Nga Artan Kristo
