Nuk po e heq dot erën e gojës

– Kam një pyetje për stomatologen ose infeksionisten. Mishrat e dhëmbëve i kam me infeksion dhe më vijnë erë shumë të keqe. Pavarësisht se i laj pas çdo vakti, mbas pesë minutave më mbajnë përsëri erë të keqe. Kam përdorur spiramicina që më kanë bërë efekt vetëm gjatë kohës që i përdorja, por pasi i mbaroja, era fillonte përsëri. Pres një përgjigje nga ju. Faleminderit nga Megi.
Anisa Nasto, stomatologe: – Sëmundjet e mishrave të dhëmbëve janë shumë të vështira për t’u mjekuar, jo se nuk kemi mjetet e duhura, por sepse kërkojnë një përkushtim shumë të madh nga ana e pacientit. Është e domosdoshme të bëhet pastrim gurëzash i thellë dhe shumë i shpeshtë me kontrolle fillimisht çdo muaj sa të qetësohet situata dhe më pas, çdo 3 muaj.
– Ju duhet higjienë maksimale, siç e kam thënë edhe më parë, në numrat e kaluar të gazetës. Nevojitet vazhdimisht përdorimi i fijes interdentare, shpëlarës goje me klorexedine dhe eleminimi i çdo mbushjeje ose ure që mund të acarojë mishrat. Në qoftë se nuk zbatohen këto këshilla, gingiviti, që është shenja e parë, kalon në paradontozë me xhepa të thellë dhe bie erë të keqe nga goja. Për pasojë, sjell dhe lëvizshmërinë e dhëmbëve dhe më pas, humbjen e tyre. Ndaj duhet kujdes i veçantë dhe një kontroll me imtësi te mjeku stomatolog sa më shpejt të jetë e mundur.