– Para disa ditësh pashë në ëndërr djalin tim 3 vjeç i cili u rrëzua nga dritarja e katit të tretë, por unë nuk arrita dot ta tërhiqja dhe më rrëshqiti nga duart. Kur zbrita poshtë, kishte marrë ca plagë të lehta ngjyrë mavi në ballë. Ishte i tronditur dhe i trembur, por nga mendja ishte top. Mora frymë e lehtësuar që ishte në rregull. Ju lutem, më thoni çfarë shpjegimi ka, se jam shumë në ankth… Faleminderit.
– E nderuar zonjë, përveç faktit që ju jeni shumë e fiksuar pas djalit tuaj, gjë që nuk duhet ekzagjeruar, kjo ëndërr tregon për një shqetësim tuajin të brendshëm që ka lidhje në përgjithësi me familjen tuaj. Nuk ka lidhje me djalin tuaj drejtpërsëdrejti, sado që ju e lidhni me atë. Ai ka jetën e gjatë, është i shëndetshëm, thjesht ju duhet të kujdeseni për të pa u fiksuar pas tij, sepse dëmtoni veten dhe e vështirësoni rritjen e tij. Do të kaloni, ose ndoshta e keni kaluar një siklet, gjithmonë lidhje me familjen tuaj, por e përsëris që nuk ka lidhje me ndonjë aksident. Është çështje familjare dhe ju çdo gjë që përjetoni e lidhni me fëmijën tuaj, sepse shqetësoheni për të ardhmen e tij. Gjithsesi, fundi i ëndrrës tregon që çdo gjë është kalimtare, marrja frymë e lehtësuar, do të thotë lehtësim nga çdo siklet dhe do të keni veç të tjerash, lajme të mira.
