Renato Karlos Martins Junior është emri i tij i vërtetë, por për të gjithë, njihet si Renatinjo. Klubi korçar zyrtarizoi afrimin e sulmuesit 28-vjeçar nga Brazili gjatë kësaj merkatoje. Lojtari është mjaft teknik dhe mund t’i shërbejë shumë Skënderbeut në këtë kampionat. Por, përveç aftësive të mira si futbollist, braziliani ka fituar famën e të gjithëve edhe për shkak të miqësisë që ka me yllin e Barcelonës, Nejmarin. Përveç fotove të publikuara në llogaritë e tij sociale, pak ditë më parë ishte vetë ylli i Barçës që i ktheu përgjigje në Instagram, pas urimit të këtij të fundit për ditëlindjen e tij. Renatinjo ka vetëm pak javë në Shqipëri, por se sa dhe si është përshtatur, ai e tregon nëpërmjet kësaj interviste…
Eraldo Harlicaj: – Përshëndetje Renatinjo! Si ndiheni në Shqipëri?
Renatinjo: – Përshëndetje Eraldo dhe përshëndetje të gjithë shqiptarëve. Mjaft mirë. Më kanë pritur shumë ngrohtë dhe jam i lumtur për këtë fakt. Nuk jam përshtatur akoma krejtësisht, por e përgjithshmja është pozitive.
– Ju pëlqen qyteti i Korçës?
– Nuk e kam vizituar akoma krejtësisht, por më pëlqen. Është qytet i vogël, por i bukur.
– Nuk keni pasur miq që t’jua tregonin?
– Jo, nuk ka lidhje, por ne kemi qenë të grumbulluar në Durrës te vendi ku qëndrojmë e që nuk po ia kujtoj dot emrin tani… (Qesh)
– Si e shihni ekipin?
– Niveli është i lartë dhe ka lojtarë mjaft të mirë në përbërje. Nuk mund të jap një gjykim më tepër, pasi mua më duken të gjithë të mirë.
– I njihni të gjithë lojtarët tashmë?
– Po, pasi u bë një muaj në Shqipëri dhe jam stërvitur me skuadrën.
– Keni luajtur në dy ndeshje. Si është të shijosh aktivizimin?
– Kam luajtur kundër Kukësit dhe Vllaznisë. Ndihem mirë, por natyrisht, dua më shumë minuta në dispozicion për të treguar më të mirën time.
– A keni arritur të krijoni një përshtypje për nivelin e kampionatit tonë?
– Jo, akoma, është herët për ta bërë diçka të tillë, por deri tani më duket me konkurrencë. Skënderbeu kampion, natyrisht. (Qesh)
– E ke mësuar apo ta kanë mësuar këtë frazë?
– Jo, jo e mendoj vërtet!
– Cilin shihni si sulmuesin më të mirë në ekip?
– Për Salihin më kanë folur shumë mirë dhe e shoh nivelin e tij edhe në stërvitje. Xhejmsi është një lojtar me potencial. Konkurrenca është e madhe, por unë jam këtu për të luftuar për një vend në formacion.
Braziliani dhe Shqipëria
– Një fjalë në shqip?
– Ujë.
– Ekipi i cilit qytet është Skënderbeu?
– I Korçës.
– Tifozët e ekipit tuaj?
– Ujqërit e dëborës.
– Kryeqyteti ynë?
– Tirana.
– Monedha jonë?
– Lek.
– Heroi ynë Kombëtar?
– (Qesh) Këtë ma kanë mësuar, e pranoj. Skënderbeu.
– Qyteti më verior?
– Nuk e di.
– Më jugori?
– No, no. (Qesh)
– Ushqimi tradicional i Korçës?
– Ej, akoma nuk e njoh aq mirë. (Qesh)
Renatinjo dhe Nejmari
– Te ne ka bërë shumë përshtypje miqësia juaj me Nejmarin…
– Nejmarin e kam mik dhe është një shok i mirë.
– Si keni krijuar afrimitet ju të dy?
– Në Brazil kemi dalë të dy nga Akademia e Santosit dhe aty jemi miqësuar. E ruajmë respektin reciprok.
– Bëri shumë bujë edhe fakti që ai ju ktheu urimin e ditëlindjes…
– Nuk ka asgjë për t’u çuditur. Është një urim mes miqsh.
– Si është të kesh mik një yll të futbollit botëror që luan me Barcelonën?
– Nuk është një fakt që ka rëndësi, pasi ai është një njeri i thejshtë, paavarësisht se është ndër më të mirët në botë.
– Keni biseduar për transferimin në Shqipëri?
– Është në dijeni, por nuk kemi folur shumë pasi kemi qenë të dy të impenjuar.
– Do të vijë në Shqipëri për t’iu shikuar në ndonjë takim?
– Nuk e di… nuk e kam biseduar ndonjëherë këtë gjë me të.
