Këngëtari i hitit “Sa vite”, edhe pse këtë periudhë është shumë i angazhuar me koncerte kryesisht jashtë Shqipërisë, e gjeti kohën për të realizuar këtë intervistë ku ndër të tjera, na rrëfen edhe për dashurinë që po përjeton prej dy vjetësh. Me këngët dhe zërin e tij ai ka bërë shumë vajza për vete, por vetëm njëra ia ka rrëmbyer zemrën Albatritit aq shumë sa këto ditë të ndryshojë status… duke u fejuar. E megjithatë avazhdon të jetë këngëtari i preferuar, kryesisht nga femrat. Në këngën e tij të fundit “Lajkatare” Albatriti është munduar të sjellë në vëmendje aktualitetin e rinisë së sotme ku mbizotëron lakmia materiale. Për të mësuar më tepër, lexoni këtë intervistë të tij, ndërkohë që dëgjoni këngën “Lajkatare”…
Mia.B: – Albatrit, kënga “Lajkatare” të rikthen edhe një herë në vëmendjen e publikut të cilit i kishe munguar… Ç’më thua për këngën?
Albatrit Muqiqi: – Në këngën “Lajkatare” jam munduar të sjell aktualitetin e rinisë së sotme që duket se ka lakmi të tepruar materiale dhe shpresoj t’ia kem arritur pak a shumë t’ia qëlloj temës që sot është kaq aktuale në shoqërinë tonë.
– Të ka qëlluar të njohësh shumë femra si ajo e këngës në jetë?
– Po, kam njohur dhe ky ka qenë lloji i femrës që më ka irrituar më së shumti dhe që e kam injoruar gjithmonë.
– Vetëm para pak ditësh ti publikove në Instagram foton e të dashurës, një vajzë brune mjaft simpatike.. Çfarë duhet të dimë për të?
– Po, është e vërtetë, ajo është e dashura ime që prej 2 vitesh. Besoj se kaq mjafton për momentin…
– …gjithashtu para pak ditësh ju shpallët edhe fejesën…
– Po. (Buzëqesh)
– Mendon se tani edhe qasja e fanseve femra do të jetë tjetër për sa kohë ti nuk do të jesh i disponueshëm?
– Jo, nuk besoj, përkundrazi, respekti ndaj meje është edhe më i madh.
– Sa herë ke dashuruar në jetë?
– 2 herë. Nënën time dhe të fejuarën. (Qesh)
– Kur e kupton Albatriti se ka rënë kokë e këmbë në dashuri?
– Në momentin kur kam ra n’dashni e kam kuptu. (Buzëqesh)
– Në procesin e tërheqjes, mendon se e ngjashmja tërheq të ngjashmen apo janë të kundërtat ato që tërhiqen?
– Mendoj se duhet t’i kesh shumë gjëra të përbashkëta dhe të ngjashme që të kesh sukses dhe një lidhje të fortë e të mirë.
– Sa ka zgjatur lidhja jote më e gjatë?
– S’kam koment.
– Beson në femrën e ëndrrave?
– Këtë vajzën e ëndrrave e kam bo realitet. (Qesh)
– Si e kupton se është ajo e duhura?
– Duhet pak a shumë t’ia lëmë edhe kohës, por e kam të duhurën.
– Ke qenë më shumë me fat si artist apo si person?
– Si person them më shumë sepse kjo e para të ndihmon me të dytën.
– Cilësia më e mirë që i njeh vetes?
– Janë dy, sinqeriteti dhe thjeshtësia.
– Ke arritur të kapësh gjithmonë momentin e duhur në jetë, karrierë e dashuri?
– Po dhe kam pas sukses.
– Ku qëndron ngjashmëria midis zgjedhjes së një femre të mirë dhe një muzike të mirë?
– Kur i ke sytë dhe veshët e mirë, gjen zgjidhje për të dyja, normalisht të mira.
– Hera e fundit që të ka emocionuar një përqafim…
– Përqafimi i mamit para 3 ditësh.
– Kur ndodhesh në shtëpi, si të pëlqen ta shfrytëzosh kohën?
– Normalisht, me familje dhe kam studion në shtëpi ku këndoj dhe ushtrohem për koncertet e mia live ku jam i ftuar.
– Çfarë ta pasuron shpirtin?
– Njerëzit e dashur dhe të sinqertë që kam përreth vetes.
– Cili ka qenë mendimi i fundit mbrëmë para se të flije?
– Me kë ta bëj duetin e radhës?
– Je një besimtar i mirë?
– Po.
– Njëra ndër këngët e tua që dëgjohet ende me dëshirë është “Sa vite”. Tani që kanë kaluar vite që nga ajo këngë, ke menduar të bësh një këngë tjetër me titullin “Sa vite 2”?
– Më vjen mirë që “Sa vite” është pëlqy kaq shumë, por do të mundohem të sjell në tetor një baladë akoma më të mirë që shpresoj të kënaqë shijet e fansave të mi.
– Çfarë të bën nervoz?
– Gënjeshtrat dhe njerëzit me dy fytyra.
– Je tipi i djalit që do të bënte gjithçka për dashurinë?
– Për një dashuri të sinqertë dhe që është me zemër, po, jam.
– Cilën nga këngët e tua do t’u rekomandoje fansave të dëgjonin si terapi pas një ndarjeje?
– Normalisht “Lajkataren”. (Qesh)
– Nga cili mëkat je përpjekur ta frenosh gjithmonë veten?
– Të gjithë besoj se kemi mëkatuar, por unë nuk e frenoj veten nga asnjë mëkat sepse jam i drejtë dhe mundohem sa më shumë të kem kujdes në këtë drejtim.
– Nëse flasim për qëllime në jetë, cilat janë të tuat?
– Që të arrij sa më shumë në muzikë, ta ndërtoj një karrierë të pastër me muzikë të mirë, pa skandale.
– Çfarë nuk dinë njerëzit për ty dhe do të doje t’ua bëje të qartë?
– Mendoj se aq sa dinë, mirë janë. (Buzëqesh)
– Kur merr vendime, i bën me mendje apo me zemër?
– Në profesion i bëj edhe me mendje edhe me zemër, sepse muzikën e ndiej dhe e dua.
– Vendi ku je kënaqur më shumë së fundi, ku ia ke kaluar bukur?
– Në Monako, ku kam qëndruar 1 javë dhe jam kënaq pa fund, është vendi ku kam fjet më së paku në jetën time. (Qesh)
– Ke mësuar më shumë nga gabimet e tua apo nga gabimet e të tjerëve?
– E dyanshme, por më shumë nga gabimet e mia.
– Cili është gabimi më i madh që ke bërë?
– Gabime të vogla ndonjëherë në muzikë ose diçka tjetër, por s’kam bërë ndonjë gabim të madh, fatmirësisht.
