Simpatik, tërheqës, një ndër djemtë më të preferuar të vajzave ndërsa ishte konkurrent në Big Brother, por edhe tani. Vigan Shehu, djali nga Kosova sapo ka publikuar këngën dhe klipin e tij të parë “Nuk e mendoja”. Në fakt, edhe pse nuk e mendonim se Vigani do të merrej me muzikë, ai na zbuloi diçka që pjesa më e madhe e njerëzve nuk e dinin: Ai nuk ka hyrë rastësisht në muzikë. Pas suksesit që pati me “Nuk e mendoja”, Vigani do të marrë pjesë edhe në Top Fest 12. Presim…
Mia. B: – Vigan, kurioziteti për të mësuar se ç’të bindi që t’i futeshe muzikës, është i madh…
Vigan Shehu: – Ka më shumë se 12 vjet që merrem me muzikë, pasi kam bërë shkollën e mesme të muzikës për instrumentin e klarinetës dhe kam qenë kitarist me një grup, me të cilin kam performuar në shumë klabe nate. E reja është vetëm se më parë nuk isha shfaqur si këngëtar…
– Pjesëmarrja në Big Brother, kishte synim çmimin e madh apo pikërisht atë famën që mund ta përdorësh sot në muzikë?
– Vizioni im ishte të luftoja, të shkoja deri në finale dhe të fitoja Bigun pasi isha shumë afër, por nuk e arrita dot. Megjithatë, popullariteti që fitova kur dola jashtë shtëpisë, po më ndihmon në rrugën time drejt muzikës, për të arritur sukseset e mia. Kënga dhe klipi “Nuk e mendoja” është pëlqyer goxha, i ka kaluar shumë më shumë pritshmëritë e mia.
– Unë nuk e mendoja që Vigani do t’i futej muzikës. Po ti, çfarë nuk mendoje?
– Unë nuk e mendoja se fundi do të ishte pa njëri-tjetrin. (Buzëqesh)
– Ndërkohë, përpara është edhe pjesëmarrja jote në Top Fest 12. Kjo më bën të mendoj që ti muzikën nuk e ke thjesht një hobi…
– Po, është shumë e vërtetë. Muzika, përveçse hobi, tani është bërë një punë për mua. Sapo kam hapur studion e muzikës “ViVa Melody” ku përveç këngëve të mia, po merrem edhe me projekte të këngëtarëve të tjerë. Në studio kompozojmë bashkë me vëllain, Valonin.
– Vigan, një djali simpatik si ti nuk i ka munguar vëmendja e femrave, besoj…
– (Qesh) Po, por tani që kam filluar të merrem me muzikë, vëmendja është shtuar.
– Pse pjesa më e madhe e femrave pëlqejnë meshkujt e njohur?
– Mendoj se kjo ndodh ngaqë shfaqja e tyre e shpeshtë nëpër media, ndikon te vajzat të cilat fillojnë të krijojnë një lloj simpatie.
– Po një mashkull i njohur, preferon të ketë në krah një femër të njohur apo një të thjeshtë?
– Për mua, ka vlera shumë të mëdha brendësia e një femre. Rëndësi ka të jetë e thjeshtë sepse edhe e thjeshta mund të jetë e njohur.
– Cili është njeriu të cilit i beson më shumë?
– Personat e familjes.
– Për të rrëfyer diçka, do të zgjidhje shokun apo shoqen?
– Shokun.
– Miqësitë e tua, i kanë rezistuar kohës?
– Po, mendoj se të gjitha.
– Kur zgjohesh në mëngjes, del me plan nga shtëpia për ta bërë ditën tënde të bukur apo ia lë çdo gjë rastësisë?
– Zakonisht, kur zgjohem nga shtëpia, dal gjithmonë me plane, por ndodh shpesh që rastësitë që shfaqen, thjesht ma zbukurojnë ditën. (Buzëqesh)
– Çfarë rrjedhe mori dita jote sot?
– Sot ishte një ditë shkolle për mua. Isha në Prishtinë për një provim. Jam në vitin e parë të studimeve master për bankë dhe financë.
– Më fol pak për stilin tënd në muzikë…
– Mendoj se stili i muzikës ka të bëjë shumë me personalitetin e njeriut. Unë jam natyrë e butë dhe romantik, andaj mundohem që të qëndroj te baladat.
– Një bashkëpunim perfekt do të ishte me…
– Me të preferuarën time, Elvana Gjatën.
– Për t’u rikthyer te femrat, çfarë e bën një femër joshëse për ty?
– Thjeshtësia e saj. Kjo është gjëja më pozitive për mua.
– Në dashuri, je tip i vendosur apo nga ata që i rikthehen një dashurie të kaluar?
– Mundohem të jem i vendosur, por ka pasur edhe raste kur jam kthyer te dashuritë e kaluara.
– Beson në miqësinë mes një mashkulli dhe një femre?
– Po, besoj dhe e vlerësoj shumë.
– Çfarë distance duhet të mbajnë ata për t’i shpëtuar joshjes?
– Thjesht, të kuptojnë fjalën “miqësi”, gjithmonë në qoftë se është një miqësi e vërtetë.
– Thonë se mashkulli dashuron vetëm njëherë, por vetë meshkujt e kanë hedhur poshtë këtë. Ti, sa herë ke dashuruar deri tani?
– (Qesh) Dashuri tamam, akoma s’kam përjetuar.
– Një femër që të refuzon, të tërheq më shumë apo të lodh?
– Më tërheq më shumë sepse më pëlqejnë femnat e vështira.
– Aktualisht, ke ndonjërën në krah?
– Jo, jam singëll…
– Je tip që frekuenton jetën e natës, që preferon vende të qeta apo të mbyllesh në studio duke krijuar muzikë?
– Them se që të treja këto janë të preferuarat e mia. Zgjedhja varet shumë nga gjendja emocionale që kam.
– Për çfarë ke nevojë tani?
– Për shumë punë, që të arrij pak sukses.
– E ke frikë vetminë?
– Jo, asnjëherë.
– Çfarë po mendon, ndërkohë që iu përgjigjesh pyetjeve?
– Thjesht, po mundohem të përqendrohem që të jem sa më i saktë me publikun. (Buzëqesh)
– Është më keq të dështosh apo të mos e provosh kurrë?
– Është më keq të mos e provosh kurrë sepse mëson më shumë nga dështimet…
– Për ç’gjë që nuk e ke provuar apo realizuar, je penduar sot?
– Nga pretendimet që kam pasur, nuk kam hasur akoma në diçka të tillë që të kem dilema për ta realizuar apo provuar. Deri tani, ato që i kam menduar, të gjitha i kam realizuar dhe provuar.
– Çfarë të pëlqen më shumë te Vigani?
– Qetësia që kam.
– Po ajo që ia bën kritikë vetes?
– Ua jap mundësinë disa personave të më qëndrojnë afër, më pas ndryshojnë dhe mundohen të përfitojnë nga unë.
– Arrin të kapësh gjithmonë momentin e duhur në jetë, karrierë, dashuri?
– Po, mundohem shumë, sidomos në jetë dhe karrierë, që janë synimet e mia kryesore për të ardhmen.
– Hera e fundit që ke humbur në një përqafim emocionues…
– Rreth një muaj më parë.
– Çfarë ndjen të thuash tani?
– Se sa interesante dhe të bukura ishin pyetjet… (Buzëqesh)
– Dhe së fundi, e vazhdon ende miqësinë me Elenën?
– Jo, nuk kam më asnjë miqësi me Elenën.
