Ishe thjesht një ëndërr
Në të kam munguar, këtë jo s’e di
por në ditet që kalonin, më mungoje ti
Mbase fjalët e mia, duken pa kuptim
por jam e sigurtë që je në shpirtin tim
E nëse ëndrrat i thur gabimisht
i thur me shpresën që do t’jemi të dy.
Nuk e di mbase gabohem
Ashtu siç gabimisht të dashurova ty.
Se ti ishe thjesht një ëndërr
Iluzion që s’gjen mbarim
Mbarim s’gjen as dashuria ime
e rrethuar me zhgënjim. Maurisja Xhamaqi
Enë komunikuese
Sa herë i jam lutur Zotit për të t’pasur pranë
E dhëmbët kam shtrënguar në dhimbjet e tua
Por sonte në këtë mbrëmje, ku fuqitë më lanë
Të thashë pas mijëra herëve, të fundit herë “të dua”
Duke të dashuruar kisha humbur pa vetëdije
Dhe ndjenjat e njeriut një ditë dhënkan fund.
Nuk mund t’i frysh i vetëm një zjarri dashurie.
Sa për dy të duash, shpirtërisht, nuk mund…
Dhe fizikisht do të thoja është shkatërruese
Kur jep e vetëm jep, një ditë shterron fuqia
Marrëdhënia mes një çifti, “enë komunikuese”
Ku zemrat janë dy enët, kanali dashuria… Bledi Ylli
Lule
Eci duke mbjellë lule
E ato më mbijnë
Ndër varre!
Shpirti im, loton e qan,
E ecën sërish,
E lule mbjell!
Vdekjen dot s’e shmangim,
Ndaj duhet të jemi të bukur
Në tokë e në qiell! Miltiadh Davidhi
Absurde
Nisi kjo ditë e përmalluar
Shpirti mendimet i kthen në varg
Njerëz pa fund të dashuruar
Disa të ngjitur, të tjerë nga larg…
Disa të ngjitur, të tjerë të ndarë
Me lot disa, disa të qeshur
“Njerëz të qeshur e të qarë”
Kjo jetë kështu na ka përleshur!
Nisi kjo ditë si gjithë të tjerat
Realitet edhe përrallë
Njerëzit gjithmonë do dashurohen
Disa së bashku, të tjerë në mall… Bledi Ylli