Është problem lëkure apo alergji?

– Kam një pyetje për Dr. Mirën. Motra ime ka disa njolla në kurriz që duken si myk lëkure, ose është ndonjë alergji e mundshme. Ndonjëherë i zhduken komplet, ndonjëherë i shfaqen dyfish. Ajo më thotë që është alergjike dhe unë dua të di: Ta çoj te dermatologu apo duhet alergolog?
Dr. Mira Xhixha, alergologe: – I/e nderuar lexues! Në rastin e motrës suaj, do t’ju rekomandoja një vizitë sa më të shpejtë tek alergologu pasi gjendja që më paraqisni më duket më shumë alergji sesa myk i lëkurës. E them këtë duke u nisur nga fakti që këto njolla shfaqen dhe zhduken. Myku i lëkurës vazhdon shfaqjen dhe shtrirjen në sipërfaqe më të madhe të lëkurës me kalimin e kohës, kurse një alergji mund të shfaqet dhe të zhduket përsëri, gjithmonë në varësi të shkakut dhe ekspozimit ndaj tij, ndaj jeni të mirëpritur të bëni një vizitë për alergjinë. Me respekt, doktoresha.