Rregulli numër një? Mos e ofendo të zotin e shtëpisë! Ama, ti nuk e di se sa shumë veprime “të pafajshme” mund ta ofendojnë atë, ndaj, nëse të pëlqen t’i biesh botës rrotull, është mirë t’i dish këto rregulla. Do të udhëtosh nesër, pasnesër apo kurdoqoftë, mirë është që shkrimin tonë, ta lexosh sot!
- Në Kore duhet të presësh radhën
Në Kore nuk duhet të fillosh të hash, pa filluar të hajë burri më plak në tavolinë. Nëse një person më i madh se ti në moshë të ofron një pije, atëhere merre atë me të dyja duart.
- Mos jep ushqim me shkopinj në Japoni
Dihet se shkopinjtë e vegjël përdoren për të ngrënë në Japoni, por ju kurrë nuk duhet t’i ofroni dikujt tjetër ushqim me shkopinjtë tuaj, pasi ato, tradicionalisht, përdoren për të futur kockat (e të vdekurit të kremuar) në urnë, nëpër funerale, ku dy vetë mund të mbajnë të njëjtën kockë (nga ku rrjedh edhe rregulli). Pra, t’i kalosh ushqimin tjetrit me shkopinj, është mungesë respekti. Në Japoni, gjithashtu, nuk duhet t’i lësh shkopinjtë vertikalisht mbi ushqim. Nëse jeni në një restorant, kjo shihet si mungesë respekti ndaj pronarit të tij.
- Në Kinë, mos ia drejto shkopinjtë tjetrit
Ndërkohë, në Kinë nuk duhet t’ia drejtosh kurrë tjetrit shkopinjtë e tu.
- Mos ha me pirun në Tajlandë
Etiketa e të ngrënit në Tajlandë e do që piruni të përdoret vetëm për të vënë ushqimin në lugë, nga e cila mund të hash. Nuk duhet ta futësh pirunin në gojë!
- Mbaje supën larg, në Britani
Në Britani, supa nuk duhet thithur nga luga, por të gëlltitet me gllënjka të vogla. Ajo duhet ngrënë nga ana e lugës, jo nga maja e saj dhe që të dyja, edhe pjata, edhe luga, duhen mbajtur larg, nëse do të dukesh i rafinuar.
- Në vendet arabe, duhet të hash me dorën e djathë
Nëse po viziton një vend arab, tregohu shumë i kujdesshëm se me cilën dorë ha. Dora e majtë nuk duhet përdorur kurrsesi, sepse ajo mendohet që përdoret në tualet dhe për të këtë arsye, është e papastër.
- Mos ha me duar në Kili
Në Kili, duhet të hash vetëm me lugë e pirun. Kilianët nuk hanë kurrë me duar, kështu që, kujdes kur kap patatet e skuqura!
- Refuzo herën e parë në Itali
Italianët njihen për pasionin e tyre ndaj ushqimit, por nëse të ofrojnë të hash, është mirësjellje të refuzosh herën e parë. Nëse ushqimi të ofrohet sërish, duhet të pranosh gjithmonë. Ama, mos kërko më shumë djathë, se do të fyesh të zotin e shtëpisë.
- Shko me vonesë në një darkë, në Tanzani
Në përgjithësi, përpikmëria shihet si diçka pozitive, por në Tanzani, të shkosh në kohën e duhur, është një fyerje për të zotin e shtëpisë. Për të qenë i sjellshëm, duhet të paraqitesh 20 minuta më vonë.
- Mos ha shpejt në Francë
Të ngrënit në Francë është diçka serioze dhe vakti, një mënyrë për t’ia kaluar këndshëm. Në fakt, nxitimi në të ngrënë konsiderohet mungesë edukate, prandaj merre shtruar dhe shijo ushqimin.
- Kur duhet të zbrazësh pjatën
Në Francë, Japoni dhe vende të tjera, një pjatë e zbrazur tregon që të ka pëlqyer ushqimi, por në kultura të tjera, si Filipine, Kamboxhia, Egjipt, etj., mendojnë se nëse e ke mbaruar gjithë ushqimin në pjatë, kjo tregon se i zoti i shtëpisë nuk të ka ngopur sa duhet.
- Gromësi pasi ke ngrënë në Indi
Sigurohu të gromësish pasi ke ngrënë në Indi dhe Kinë, në mënyrë që i zoti i shtëpisë të kuptojë se je ngopur. Nëse je mik në një shtëpi inuitësh (të cilët jetojnë në Groenlandë, Alaskë, etj.), je i lirë të bësh edhe p… për të treguar vlerësimin tënd.
- Kontrollo se çfarë hanë fëmijët e tu në Xhamajka
Çfarë ha, mund të jetë po aq e rëndësishme edhe se si e ha ushqimin. Në Xhamajka mendohet se fëmijët që hanë mish pule para se të fillojnë të flasin, nuk do të flasin kurrë.
- Mos prit një filxhan çaji të mbushur plot, në Kazakistan
Mos u fyej nëse i zoti i shtëpisë kazak të ofron një filxhani çaji të mbushur përgjysmë. Nëse filxhani është i mbushur plot, kjo është shenjë që tregon se ai do që të ikësh.
- Mos e përdor kriporen në Egjipt
Tregohu i kujdesshëm edhe me kripën e piperin. Në Egjipt, të përdorësh kriporen është fyerje për kuzhinierin, ndërsa në Azerbajxhan, të derdhësh pa dashje kripën tregon se së shpejti do të fillojë grindja.
