Me gjithë kërkesat e saj të përsëritura, mjekët thonin se ishte shumë e re për t’iu nënshtruar kësaj analize
Ishte 24 vjeçe, kur shkoi te mjeku i saj me dhimbje të forta shpine në dhjetorin e vitit 2012, por iu mohua një procedurë e thjeshtë Pap-Testi, me arsyen e vetme se nuk i kishte mbushur ende 25 vjeç, mosha minimale që kërkohet për të nisur kryerjen e kësaj analize!
U deshën javë të tëra vizitash mjekësore, para se Daun Ueston t’i nënshtrohej kësaj analize, e cila në të vërtetë, konfirmoi se vajza tashmë, jo vetëm që ishte prekur nga kanceri i qafës së mitrës, por ai edhe kishte avancuar…
Në fillim, Daun mendoi se dhimbjet e shpinës i kishte ngaqë qëndronte vazhdimisht në këmbë, duke qenë se punonte si parukiere. Një natë, kur u kthye në shtëpi duke qarë nga dhimbjet e forta, i fejuari këmbënguli që të vizitohej te një mjek. Por, lindi një problem tjetër! Mjekët nuk pranonin që vajza të bënte pap-test, pasi sipas rregullave, ishte shumë e vogël për t’iu nënshtruar një analize të tillë.
Pas shumë sorollatjesh dhe analizash, muaj më pas, Daun bëri një pap-test, i cili e diagnostikoi me kancer. Trajtimi fillestar pati sukses, por sëmundja u rishfaq që Nëntor 2013, kur mjekët konfirmuan se tashmë, kanceri ishte në fazën e tij fatale dhe i dhanë asaj edhe pak muaj jetë…
Atëhere, çifti vendosi të shpejtonte me dasmën, e cila u bë para se të niste cikli i trajtimit me kimioterapi. Ueston vdiq në moshën 26 vjeçare, ndërsa aktualisht, i fejuari i saj po lufton që të ulet mosha e ekzaminimit me pap-test…