\u201cNa mbyti vapa\u201d, thash\u00eb dhe dola nj\u00eb xhiro andej nga Liqeni. Teksa shikoja me bisht t\u00eb syrit, her\u00eb me syrin e majt\u00eb dhe her\u00eb me t\u00eb djathtin femrat q\u00eb b\u00ebnin vrap, vura re nj\u00eb person t\u00eb ve\u00e7ant\u00eb q\u00eb edhe ai vraponte. N\u00eb nj\u00ebr\u00ebn dor\u00eb mbante nj\u00eb kov\u00eb me uj\u00eb. Dor\u00ebn tjet\u00ebr e kishte vendosur mbi kok\u00eb, duke shtr\u00ebnguar kapelen. M\u00eb b\u00ebri p\u00ebrshtypje. Mbushte uj\u00eb n\u00eb liqen dhe vraponte e ujiste pem\u00ebt. K\u00ebt\u00eb gj\u00eb e b\u00ebnte shum\u00eb her\u00eb. U afrova dhe e njoha. Ishte zoti Sazan Guri…<\/p>\n
– P\u00ebrsh\u00ebndetje, zoti Guri! \u00c7\u2019po b\u00ebni?
\n– P\u00ebrsh\u00ebndetje Kaso! Po ujis k\u00ebto pem\u00ebt. Ka dit\u00eb pa r\u00ebn\u00eb shi. Po thahen fare.
\n– Ju lumt\u00eb, zoti Guri!
\n– Faleminderit Kaso! Un\u00eb vij \u00e7do dit\u00eb o Kaso dhe marr uj\u00eb nga Liqeni e ua hedh pem\u00ebve. E b\u00ebj k\u00ebt\u00eb gj\u00eb, i maskuar. Ndaj mbaj kapelen, q\u00eb t\u00eb mos m\u00eb njohin. Nj\u00ebher\u00eb m\u00eb ndaloi policia dhe m\u00eb \u00e7uan n\u00eb komisariat.
\n– \u00c7\u2019ju b\u00ebn\u00eb aty?
\n– Eh, Kaso! M\u00eb proceduan. \u201cPo than Liqenin\u201d, m\u00eb than\u00eb. M\u00eb vun\u00eb nja 200 mij\u00eb l\u00ebk\u00eb gjob\u00eb.
\n– Keni koh\u00eb q\u00eb e b\u00ebni k\u00ebt\u00eb veprim, zoti Guri?
\n– Q\u00ebkur erdha nga Berati n\u00eb Tiran\u00eb, o Kaso, k\u00ebt\u00eb gj\u00eb b\u00ebj. Deri m\u00eb tani mund t\u00eb kem larguar nga Liqeni me mij\u00ebra metra kub uj\u00eb. Q\u00eb t\u00eb ta them tro\u00e7: Un\u00eb e kam thar\u00eb Liqenin Artificial.
\n– Ou?! Meq\u00eb u takuam zoti Guri, jemi q\u00eb jemi, po ju pyes: A mendoni se do t\u00eb merrni vota n\u00eb k\u00ebto zgjedhje?
\n– Sigurisht, Kaso! Mua do t\u00eb m\u00eb votojn\u00eb t\u00eb majt\u00eb dhe t\u00eb djatht\u00eb.
\n– P\u00ebrse?
\n– P\u00ebr shkak t\u00eb kapel\u00ebs q\u00eb mbaj.
\n– Nuk ju kuptoj…
\n– Po ja, or Kaso. E shikon kapel\u00ebn time ti?
\n– E shikoj zoti Guri, por nuk gjej arsye q\u00eb t\u2019ju votojn\u00eb p\u00ebr kapel\u00ebn…
\n– E thjesht\u00eb, Kaso. Ti e di q\u00eb kjo kapel\u00eb Kaso, quhet \u201ckapel\u00eb republike\u201d. T\u00eb djatht\u00ebt do t\u00eb m\u00eb votojn\u00eb se do t\u2019u dukem republikan. T\u00eb majt\u00ebt do t\u00eb m\u00eb votojn\u00eb se u dukem si ish-Sigurims. Ndaj e mbaj kapel\u00ebn shumic\u00ebn e koh\u00ebs n\u00eb rrug\u00eb dhe studio televizive un\u00eb Kaso; t\u00eb m\u00eb votojn\u00eb t\u00eb majt\u00eb e t\u00eb djatht\u00eb. Kuptove?
\n– Kuptova, zoti Guri. \u00c7\u2019do t\u00eb b\u00ebnit ju n\u00ebse do t\u00eb ishit Kryetar i Bashkis\u00eb s\u00eb Tiran\u00ebs?
\n– Do t\u2019i jepja oksigjen qytetit, Kaso.
\n– N\u00eb \u00e7\u2019m\u00ebnyr\u00eb?
\n– I ke par\u00eb depozitat e ujit mbi tarraca ti Kaso? Do detyroja \u00e7do banor q\u00eb t\u00eb vendoste n\u00eb depozit\u00eb nj\u00eb aparat t\u00eb atill\u00eb q\u00eb e kthen ujin n\u00eb oksigjen, pra, ndan hidrogjenin nga oksigjeni.
\n– A \u00ebsht\u00eb e mundur kjo zoti Guri?
\n– Sigurisht, Kaso! Ti e di q\u00eb un\u00eb jam shkenc\u00ebtar…
\n– Po pastaj?
\n– Pastaj Kaso, n\u00eb rubinetat e ujit do dal\u00eb oksigjen. Kjo do b\u00ebj\u00eb t\u00eb mundur q\u00eb \u00e7do familje t\u00eb furnizohet me oksigjen t\u00eb mjaftuesh\u00ebm. Kupton?
\n– Po mir\u00eb, ja \u00e7\u00ebshtjen e oksigjenit n\u00eb sht\u00ebpi e zgjidh\u00ebt. Po n\u00eb rrug\u00eb si t\u2019ia b\u00ebjm\u00eb q\u00eb t\u00eb thithim oksigjen, zoti Guri? Do mbillni pem\u00eb?
\n– Ku t\u00eb mbjell pem\u00eb, o Kaso!? Ku ka vend p\u00ebr pem\u00eb k\u00ebtu. K\u00ebtu nisi Rama projektin \u201cNj\u00eb qytetar, nj\u00eb pem\u00eb\u201d dhe u katandis \u201cNj\u00eb qytetar nj\u00eb gjethe peme\u201d. K\u00ebtu mbijn\u00eb pallatet si k\u00ebrpudhat pas shiut.
\n– Do prishni pallatet, apo nuk do t\u00eb jepni leje p\u00ebr to?
\n– \u00c7a thua o Kaso!? Kujt ia mban t\u00eb mos jap\u00eb leje p\u00ebr pallate?! Po nuk dhash\u00eb leje p\u00ebr to, mafia e nd\u00ebrtimit m\u00eb heq kapel\u00ebn me gjith\u00eb kok\u00eb\u2026
\n– Po si do t\u2019ia b\u00ebni?
\n– Un\u00eb problemin p\u00ebr oksigjen n\u00eb sht\u00ebpi do t\u2019ua zgjidh njer\u00ebzve. Ata po t\u00eb duan oksigjen n\u00eb rrug\u00ebt e qytetit, le t\u00eb l\u00ebn\u00eb dritaret hapur.
\n– Kur ju lindi dashuria p\u00ebr mjedisin, zoti Guri?
\n– Q\u00eb pa lindur, Kaso. N\u00eb Berat, kishim nj\u00eb kopsht…
\n– Kop\u00ebsht f\u00ebmij\u00ebsh? Me drek\u00eb, apo pa drek\u00eb?
\n– Kopsht me pem\u00eb, mor Kaso. E kishte st\u00ebrgjyshi. Kopshti q\u00eb thua ti, nuk kishte uj\u00eb. Kokrrat e pem\u00ebve b\u00ebheshin p\u00ebrher\u00eb t\u00eb papjekura, ndaj neve si fis na mbeti nofka \u201cAguridhe\u201d. Nga fjala Aguridhe, u krijua fjala Guri. Ndaj edhe mbiemrin e kam t\u00eb till\u00eb un\u00eb, Kaso. E, q\u00eb pa lindur, i vura vetes detyr\u00eb q\u00eb t\u00eb merresha me \u00e7\u00ebshtjet e tok\u00ebs. Tani po largohem Kaso, t\u00eb ujis ato pem\u00ebt aty. Mirupafshim babu\u00e7!
\n– Mirupafshim zoti Guri!<\/p>\n
Bisedoi me shaka Kaso KOSA<\/p>\n