Eni Koçi vjen me dy hite të reja, bashkëpunimin me Gretën edhe Gold Ag “Me mu” dhe këngën solo “Si dikur”. Kënga e parë numëroi dy milion klikime në pak ditë, ndërkohë që Eni thotë se edhe kënga e re do të ketë të njëjtin sukses. Si gjithmonë e bukur edhe shumë spontane në intervistë, ajo na tregon për punën me Gretën, vitin 2015 dhe për planet që ka. “Fillimi i mirë gjysma e punës”, shprehet Eni ndërkohë që më këndon pak nga refreni i këngës… Ajo tregon se është një vajzë shumë e thjeshtë që studion shumë, lexon libra, por edhe pak e rrezikshme për meshkujt pasi merret me kikboks… Qesh kur e pyes nëse propozimi që u përfol kaq shumë nëpër rrjetet sociale, ishte i vërtetë, por thekson se është singëll…
Rita Rrjolli: – Eni, erdhe shumë shpejt me dy hite të reja… Si ia bën?
Eni Koçi: – Përpiqem të gjej gjithmonë materialet e duhura, në mënyrë që këngët të pëlqehen nga publiku.
– Sa kohë të morën përgatitjet e këngëve?
– Rreth 1 javë na u desh për ta mbyllur këngën audio dhe dy ditë kemi qenë duke xhiruar videoklipin që ishte në bashkëpunim, ndërsa kënga e dytë më mori pak më shumë kohë.
– Sa kohë mendohej bashkëpunimi mes teje, Gretës edhe Gold Ag-ut?
– Aspak! Bashkëpunimi ynë ka dalë krejtësisht në mënyrë spontane. Kishim një material të bukur e menduam ta punonim të tre.
– E veçanta e kësaj kënge?
– Besoj se fakti që jemi bashkuar 3 artistë, secili me stilin e tij, duke sjellë diçka të veçantë.
– Doli ashtu siç e prisnit?
– Akoma më mirë nga ajo që prisnim.
– Çfarë mund të kishe përmirësuar ende?
– Asgjë.
– A i dedikohet dikujt në veçanti kjo këngë?
– Jo, kënga trajton një temë të përgjithshme komerciale. Për më shumë, përgjegjësi për tekstin është Goldi, s’e di çfarë ka patur në kokë kur e ka shkruar.
– Po kënga “Si dikur”, nuk është një dedikim?
– Jo, nuk janë dedikime sepse unë mundohem t’i qëndroj afër publikut dhe jo të këndoj për dikë në veçanti.
– “Me mu” ka renditur dy milion klikime në kohë rekord…
– Jam shumë e kënaqur, pasi pas përfundimit të çdo kënge, çdo artist këtë pret, suksesin e pëlqimin nga publiku.
– Ishe e ftuar në Londër për fundvit… Si të pritën?
– Si gjithmonë, ishte një pritje e ngrohtë mes fansash që e dashurojnë muzikën time. I falënderoj!
– Flitet se Eni Koçi është një ndër këngëtaret më të paguara në tregun shqiptar…
– Hëm… Nuk kam koment për këtë. (Qesh)
– Këngët dhe klipet i vetëmenaxhon?
– Jo, kam njerëz të cilët punojnë e kujdesen, por sigurisht që kujdesem edhe vetë.
– A mendon se këngët komerciale po pëlqehen gjithmonë e më shumë?
– Këngët komerciale do të pëlqehen gjithmonë pasi ne jemi ballkanas dhe këngët që kanë ndërthurje të folkut me komercialen janë pjesë e jona.
– Si e shikon tregun muzikor ndër vite?
– Ka këngëtarë e kompozitorë të shkëlqyer të cilët kanë sjellë vepra muzikore të shkëlqyera. Jam e kënaqur për prurjet, talentet e reja dhe për mundësitë që po u jepen këtyre talenteve për të depërtuar në tregun muzikor shqiptar.
– Ndonjë këngëtare tjetër me të cilën aspiron të bashkëpunosh?
– Kam shumë kolegë me të cilët kam miqësi, po aq sa edhe simpati profesionale, por bashkëpunimet mendohen dhe vijnë në kohën e duhur…
– E ke provuar veten në tallava?
– Më pëlqen dhe duke qenë se më pëlqen, e kam provuar.
– Do ta pranoje një bashkëpunim me Muharrem Ahmetin?
– E kemi patur në plan një bashkëpunim dhe e filluam punën, por duke qenë se të dy e kishim kohën të limituar, nuk arritëm ta çonim projektin deri në fund. Por, ai është një artist me vokal të shkëlqyer!
– Si ia bën për të mbajtur një standard muzikor?
– Punoj me njerëzit e duhur, përzgjedh këngët e tekstet dhe kujdesem për detajet e vogla, por shumë të rëndësishme.
– Mendon se fama është e lidhur me fitimet?
– Sigurisht.
– Thashethemi më i habitshëm që ke dëgjuar për veten?
– Dëgjoj pa fund e janë shumë skandaloze, por edhe më bëjnë për të qeshur njëkohësisht, me faktin që njerëzit kanë shumë kohë për thashetheme, por s’po di të specifikoj ndonjë rast.
– Të bëjnë më përshtypje fotot apo komentet në rrjetet sociale?
– Jo, më duken tepër qesharake, por janë normale, përderisa merr përsipër të jesh person publik.
– Si është një ditë e jotja e zakonshme?
– Çohem herët e bëhem gati për shkollë. Gjysmën e ditës e kaloj në shkollë e librari. Më pas shkoj në stërvitje për kickbox. Pastaj varet nga darka si rrjedhin planet, ndoshta në studio, ose qëndroj në shtëpi të studioj. Gjatë fundjavës, jam nëpër koncerte.
– Sa kohë i dedikon pamjes së jashtme?
– Mjaftueshëm, aq sa më duhet…
– A është e vështirë të jesh gjithmonë në qendër të vëmendjes?
– Është diçka e bukur. (Qesh)
– A bën saktifica?
– Bëj, varet nga situatat dhe nga njerëzit.
– Po veshjet edhe aksesorët, cilës markë ua beson?
– Nuk jam shumë e fiksuar mbas markave dhe nuk kam një firmë fikse. Kam shumë nga Micheal Kors, Dior…
– Për çfarë shpenzon më shumë?
– Më shumë me parfume.
– Si i ke raportet me paranë?
– Fatmirësisht, mendoj se di ta menaxhoj goxha mirë… (Qesh)
– Bën dhurata?
– Bëj, edhe pse e kam pak të vështirë të përzgjedh…
– Nga kush merr më shumë dhurata?
– Nga familja, shoqëria, por edhe nga fansat.
– A ka diçka personale, apo profesionale që s’e ke realizuar ende?
– Kam shumë synime në jetë dhe me shumë punë e përkushtim besoj se do të realizohen të gjitha.
– Je ende singëll?
– Single and building my empire… (Vetëm dhe duke ndërtuar perandorinë time)
