– Përshëndetje zoti avokat. Unë që po ju shkruaj jam Ana nga Tirana. Kam 20 vite që jam martuar me bashkëshortin. Gjatë këtyre viteve kemi jetuar e punuar në Greqi dhe nga kjo martesë kemi dy fëmijë, njëri 18 vjeç dhe tjetri, 19 vjeç. Pas martesës kemi blerë 3 apartamente në Tiranë. Nga gjendja ekonomike nuk jemi keq, por bashkëshorti ka rreth 5 vite që sillet si adoleshent duke më tradhtuar me femra të tjera. Ka rreth 2 vite që është larguar nga shtëpia dhe jeton me të dashurën e tij e cila është 15 vjet më e vogël. Është bërë e padurueshme kjo sjellje e tij, pasi unë kam sakrifikuar shumë për familjen. Edhe ai ka punuar shumë, por nuk e kuptoj këtë ndryshim që ka pësuar këto vite. Dua të bëj divorcin, por kam frikë mos më merr pronën bashkëshorti me gjithë të dashurën e tijm pasi në certifikatën e pronësisë figuron emri i tij dhe emri im nuk figuron fare. A mund të më ndihmoni ta ndjekë zyra juaj këtë procedurë?
Av. Alban Duraj, “Duraj Lavv Firm”, email: info@durajlavv.com, Tel. ++35544532512: – Përshëndetje zonja Ana, ju falënderoj shumë që kontaktuat me rubrikën “Ju pyesni, avokati përgjigjet”. Më vjen shumë keq për marrëdhëniet e krijuara mes jush dhe bashkëshortit tuaj por duhet të bëheni e fortë dhe të ecni përpara pasi jeta nuk përfundon me kaq.
– Në lidhje me problemin që më paraqisni, në momentin që bashkëshorti largohet nga shtëpia dhe nuk realizon asnjë detyrim familjar i cili është edhe i rregulluar me ligj, pra, me kodin e familjes, martesa në këtë rast e ka humbur qëllimin për të cilin është krijuar. Kjo është rruga e duhur që ju duhet të ndiqni, pasi bashkëshorti juaj në rastin konkret nuk përmbush detyrimin e besnikërisë bashkëshortore dhe nuk interesohet për pjesëtarët e familjes së tij, qoftë edhe duke i ndihmuar moralisht dhe shpirtërisht.
– Prona që ju keni blerë pas martesës është edhe e juaja si bashkëpronare, ndonëse emri juaj nuk figuron në certifikatat e pronësisë. Kjo, pasi legjislatori e ka përcaktuar këtë në kodin e familjes si regjistrim pasuror bashkëshortor i të dy bashkëshortëve nëse më parë ata nuk kanë nënshkruar një kontratë paramartesore për ndarjen e regjimit juridike të pronës. Me këtë informacion që ju jepni, i bie që ju nuk keni nënshkruar ndonjë marrëveshje më parë, kështu që duhet të rrini e qetë pasi kjo është pronë e të dy bashkëshortëve, pra, është edhe e juaja.
– Ju duhet të ngrini kërkesë padi në Gjykatën e Rrethit Gjyqësor Tiranë me objekt: zgjidhjen e martesës dhe pjesëtimin e pronës ose mund të ngrini fillimisht padinë për zgjidhjen e martesës dhe pasi ky vendim merr formë të prerë, duhet të ngrini padinë vetëm për pjesëtimin e pasurisë.
– Në rastin tuaj unë do t’jua sugjeroja që në të njëjtin objekt padie t’i përfshinit të dyja, pra, zgjidhjen e martesës dhe pjesëtimin e pasurisë, pasi nuk keni fëmijë të mitur për të cilët mund të kërkonit kujdestarinë dhe do ta kishit emergjente zgjidhjen e martesës. Për çdo informacion të detajuar, jeni e mirëpritur pranë Studio Ligjore “Duraj” pasi ne jemi të specializuar në këtë fushë!
